Dia di Prensa
ORANJETSAD (AAN): Manera ta costumber, cada aña riba dia 1 di september nos ta celebra Dia di Prensa na Aruba. Cada aña, comunidad ta conmemora e fecha aki, rindiendo asina un tributo na e periodistanan cu, pa motibonnan profesional, por hasta yega na pone nan bida na peliger den e esfuerso di informa nos sociedad y di promove e fluho liber di informacion.
For di momento cu Aruba a bira un estado autonomo den Reino, e isla a sa di duna e reconocemento mereci na tur esnan cu ta traha incansablemente pa mantene nos comunidad informa. E trabao di prensa nunca tabata uno facil y maske Aruba ta un pais chikito, esey no ta nifica cu prensa no ta enfrenta su retonan.
Si tene na cuenta cu e mundo moderno den cual tur hende ta bibando actualmente ta depende cada dia mas riba medionan social, e mundo di prensa mester a sa di acomoda su mes na e cambionan tecnologico tambe. Fenomenonan manera “fake news” a cuminsa bira un normativa cu ningun instancia oficial por reconoce, y como tal e prensa imparcial y obhetivo tampoco por apoya.
Prensa ta hunga un rol di sumo importancia den cualkier comunidad y como tal mester duna nan e respet mereci, pero semper teniendo na cuenta cu sensacionalismo nunca lo por sobrepasa obhetividad y integridad. Den e ordo di consideracion aki, libertad di prensa, di e mesun manera, lo mester respeta e interesnan cu merece proteccion huridico, tanto di e persona comun como tambe di e propio actividad periodistico.
Democracia ta sinonimo di libertad, y e teoria politico lo mester sa di worde aplica tambe den e contexto di e derecho na libertad di expresion di pensamento, idea y opinionnan. Cu e animo pa salvaguardia pas, ordo social y harmonia den nos poblacion, como tambe garantisa e unidad nacional y seguridad di estado, Gobierno y prensa mester sa di traha hunto pa asina logra mantene e comunidad informa debidamente. Nunca por lubida cu uzo iresponsabel di dicho libertad, por repercuti negativamente den nos sociedad, y provoca situacionnan di confusion y falta di stabilidad.
Den e mesun linea politico di e ehercicio di e libertadnan di prensa, di opinion y di expresion, Gabinete Wever-Croes ta sigui busca e mihor maneranan pa implementa accionnan cu ta faborece dicho libertadnan. Den cuadro di esaki nos Gobierno a cuminsa na renoba e Direccion di Asuntonan di Telecomunicacion (DTZ), como cu e ta un instancia gubernamental sumamente importante, y cu lamentablemente a worde poni den cashi di olvido pa hopi aña. DTZ a haya un infrastructura di ICT completamente nobo y moderno, cu ta cumpli cu tur e rekisitonan necesario pa hiba un control y apoyo na e medionan di prensa y comunicacion local.
Den e Dia di Prensa aki, tin di defende cu libertad di prensa y di opinion mester por worde eherci responsabelmente na Aruba, y worde ahusta cada biaha mas na e aspiracionnan y na e compromiso di crea un modelo di convivencia den libertad, pa e bon ehercicio di democracia, desaroyo armonioso y bienestar di tur nos ciudadanonan di Aruba en particular, y di Reino Hulandes en general.
Hecho ta cu medionan di prensa y comunicacion ta cumpliendo cu nan deber di mantene un pais debidamente informa, pero cu tambe ta aporta constructivamente na e desaroyo di Aruba. Sin medionan di prensa y comunicacion, pueblo no por ta participante activo di e pais cu ta keda den desaroyo. No por lubida cu e mesun medionan di prensa y comunicacion aki ta rekeri di e apoyo y aprobacion di un comunidad pa por sigui haci nan trabao debidamente.
Felis Dia di Prensa na tur esnan cu ta cumpli cu e tarea dificil di mantene un pais informa debidamente.
