Ivo Valdez di OPPA ta señala:
ORANJESTAD (AAN) – E Organizacion di Pensionadonan Publico di Aruba (OPPA), y tur su miembronan, ta rabia cu e cambionan cu AZV ta introduciendo, segun palabranan di Ivo Valdez, presidente di OPPA, den un entrevista cu DIARIO.
Tempo cu a introduci AZV na aña 2001, e metanan cu tabata wordo propaganda tabata pa Aruba tin un cuido medico accesible pa tur asegurado, percura pa e cuido medico ta halto, eficiente y efectivo, y naturalmente control di gasto y presupuesto.
Valdez a splica cu tempo cu a introduci AZV e pensionadonan di gobierno tabata bao “FZOG” (Fonds Ziektekosten Overheidsgepensioneerden); ora cu a introduci AZV, e gobierno di e tempo ey a priminti e pensionadonan cu nan lo mantene nan derechonan, pero segun añanan a pasa nan a cuminza perde tur e derechonan ey.
“Un otro cos cu e introduccion di AZV a trece pa nos ta cu nan a considera e pensionadonan como un ‘selfstandige’. Manera un dunador di trabao. Nos no ta un dunador di trabao; nos no por hisa nos entrada. E unico pensionadonan cu no a haya e calificacion ey ta esnan cu ta cobra pension di AOV. Pues cu ta haya un pension di SVb. Loke a sigui sistematicamente, segun añanan ta pasando, ta cu e pensionado publico a cuminza perde su derechonan; cada vez nos ta trece nan dilanti, pero ta manera gritonan den desierto”, Presidente di OPPA a señala.
Valdez a sigui splica cu AZV a introduci y un prima, y e ta puntra si “esaki ta husto?”
“Un parlamentario of minister cu tin cu tin un entrada riba 100 mil florin pa aña, ta paga 1.6% na e prima di AZV riba un entrada maximo di 85 mil florin. Esey ta 1.350 florin pa aña y apenas 113 florin pa luna.
En cambio, desde 8 di juli 2018, e pensionado di SVb cu tin apenas 30 mil florin pa aña, ta paga 6.5% na AZV. Si e pensionado ey tin un entrada riba 30 mil florin, riba e suma cu e ta pasa e 30 mil e tin cu paga 10.5%. Anto nan a introduci riba dje e BAZV riba un porcentahe mas halto. El a bira 2%. E pensionado cu un entrada di 4.864 florin pa luna, e ta haya di SVb 1.864 florin si ta un pareha casa, y di APFA, por ehemplo, 3.000 florin. Esaki ta bira 58.368 florin pa aña. Riba e 30 mil e ta bay paga 6.5% cu ta 1.950 florin y riba e 28 mil, e ta paga 10.5%, cu ta 2.979 florin. Pa aña e ta paga 4.029 y esey pa luna ta 410,75 florin”, Ivo Valdez a subraya. Mientras tanto e Minister y Parlamentarionan ta paga 113 pa luna. Pues, un diferencia grandi!
“Pero no ta solamente Minister y Parlamentario. Tur esnan cu entrada mas halto ta paga e 113 florin ey, logicamente si nan ta doño nan tin cu paga full e diferencia, pero den caso aki mi ta compare cu Minister y Parlamentario pasobra ta nan ta esnan cu a bin cu e leynan pa AZV. Nan a percura pa nan si, pero e grandinan cu a traha henter nan bida, awo den e ultimo fase di nan bida ta wordo castiga”, Valdez a remarca.
