Prome Minister:
ORANJESTAD (AAN) – Minister Presidente Evelyn Wever-Croes, contestando preguntanan pa prensa tocante e proceso electoral, a menciona cu Gobierno a pone fondonan disponible pa Conseho Supremo Electoral traha diferente pa e proceso di eleccion 2021.
“Lamentablemente, e pandemia a dal. Nos tabata tin e fondonan pa bay digitaliza. Nan (C.S.E) a reuni anto e ora ey nan a trece un lista di cierto adaptacionnan cu nan lo kier ehecuta prome cu eleccion. E lista, ami mes no conoce como Minister. Ministerraad no a trata e lista ey tampoco; pero Parlamento si, pasobra Conseho Supremo Electoral ta traha cu Parlamento y nan a presenta esaki na Parlamento algun siman pasa. Y mi a compronde di e Directora di Censo cu ta esun encarga cu organizacion pa Conseho Supremo Electoral, y el a duna declaracion na prensa siman pasa”, e dignatario a señala.
Prome Minister tin entendi cu e declaracion a wordo mal interpreta cu a Koppel un cos na otro y e por a compronde di un instancia ambiental, cu e voto di pueblo di Aruba no ta secreto mas.
“Absolutamente, esey no ta e caso! Mi ta contento cu Censo mes a cuminza aclarea. E Presidente di Conseho Supremo Electoral ta señor Glenn Thode, y no ta gobierno ta nombra e Presidente sino cu e ta wordo nombra pa Corte di Husticia. E ta esun encarga y el a duna reaccion caba”, e dignatario a remarca.
Minister Presidente ta lamenta di mira ex-prome minister Mike Eman, haciendo hopi intento pa bruha tera. Asina e dignatario a bisa. El a reitera cu “Piensa el ladron que todos son de su condicion”.
Premier Wever-Croes a duna di conoce cu el a purba di sigui e declaracion di ex-prome minister ora cu el a bay entrega un carta na Gobernador. “Un declaracion bastante incoherente, cu a mustra hopi nerviosismo, y aki mi ta haci un apelacion na tur lider politico, y ami como lider politico no como Prome Minister di Pais Aruba, esaki no ta e momento pa bruha tera den algo asina fundamental y asina sagrado, cu ta bo derecho di voto”, Prome Minister a señala.
El a declara cu aworaki ta e momento pa trece trankilidad den comunidad. Un bez den cuater aña pueblo ta haya chens pa expresa su voz, pa trece padilanti locual e kier mira den e pais aki. “No bay spanta nan, no bay bruha tera, no bay trece duda. Y mi ta sigur e dianan nos dilanti, di parti di Conseho Supremo Electoral, profesionalnan, expertonan mes lo splica kico ta e intencion pero no tin ningun, ningun intencion pa haci cambionan den e sistema. No tin tempo pa cambia e ley tampoco, tur cos mester bay segun e ley cu tin actual, cu ta garantiza cu bo voto ta keda secreto”, Minister Presidente a reitera.
