ORANJESTAD (AAN): Gerencia di Radisson Blu Aruba a reconoce nan empleado Leyonardho Lopez pa su acto heroico. Esaki a pasa djis algun siman despues di nan apertura exitoso. Nan a dune un “Life Saving Blu Award”.
Leyonardho Lopez ta traha como Pool Attendant na Radisson Blu Aruba y ta eherce su trabao cu hopi pasion. Durante estadia di un famia, a presenta un situacion cu un mucha den pool, unda cu Leyonardho a drenta den accion mesora pa asina rescata e mucha.
E reconocemento a wordo presenta pa Sr. Luigi Wix, General Manager y Srta. Jouraine Vrolijk, Directora di Human Resources. “Nos ta sumamente orguyoso di e reaccion di Leyonardho, cu tabatin solamente algun dia den su funcion pero cu a sa di actua rapidamente pa asina salba bida di un mucha”, Luigi Wix, Gerente General ta bisa.
