Parlamentario Marco Berlis (MEP):
ORANJESTAD (AAN): Durante di e dianan largo tratando presupuesto 2024 den Parlamento tremendo noticia pa pensionadonan y esnan cu ta gana un salario minimo a keda anuncia. Ta bon pa subraya cu semper ora partido MEP a sinta e salario minimo a subi casi Afl. 500 mientras ora AVP a sinta e no a ni yega cerca di esaki.
Mirando cu Mike Eman durante su gobernacion 2009-2017 a kita asina hopi beneficio y placa for di nos pensionadonan, gobierno di Aruba a dicidi pa asina sigui aumenta e poder di compra di nos grandinan.
Bon noticia pa pensionadonan
Durante di e reunion publico di presupuesto supletorio y presupuesto 2024 lo siguiente a sosode;
- Den un anuncio di minister Dangui Oduber algun siman pasa, e la anuncia cu lo bay aumenta pensioen cu 3%. Sinembargo, durante di tratamento di presupuestonan e la asegura cu e porcentahe di aumento di pensioen lo subi di 3%-4%. Sigur esaki ta un gran logro pa nos grandinan.
- Esaki ta e di 4 bes cu pensioen a keda aumenta den e ultimo 6 añanan! Apesar di crisisnan, a keda tuma cuenta cu pensionadonan y sigur minister Dangui Oduber a sa di demostra liderazgo y curason pa nos grandinan aumentando nan pensioen cu regularidad pa asina yuda pensionadonan acapara cu nan gastonan mensual.
- Durante di tratamento di Presupuesto Supletorio Parlamentario sr. Marco Berlis a presenta un mocion pa baha e prima di AZV riba pensioen. Segun minister Dangui Oduber nan ta trahando riba dje y cu esaki lo por baha di 6.5% pa 5%.
Bon noticia pa esnan cu ta gana salario minimo
Durante di e reunionnan publico di presupuesto 2024 riba diabierna, minister Glenbert Croes a haci algun anuncio importante, cual e lo elabora riba dje mas den detaye den un conferencia di prensa dialuna 18 di December 2023.
Minister Glenbert Croes a anuncia cu salario minimo lo bay wordo aumenta te na Afl. 1.986,20 pa luna. Aworaki e salario minimo lo casi bira Afl.2.000 pa luna. Adicionalmente minister a anuncia cu ta trahando riba un concepto di ley pa traha riba e “uurloon.” Esaki ta algo cu hopi ciudadano semper ta papia riba dje y tabata kier wak cambio riba dje. Esey ta haci cu aña 2024 ta bai bira un aña hopi interesante riba e topico di “uurloon,” ya cu e lo conoce cambionan importante riba dje.
Di e forma aki nos por wak cu hunto cu e progreso di nos economia, gobierno tambe ta trahando duro pa mas placa yega den e cartera di pueblo y nos grandinan y eventualmente henter pueblo lo conoce bek un era di prosperidad y ordo den nos pais.
