ORANJESTAD (AAN) Directora di Departamento di Agricultura, Cria y Pesca (LVV-Santa Rosa), señora Nathalie Maduro, a duna di conoce den entrevista cu DIARIO, cu durante aña 2023 nan a desaroya diferente actividad.
Entre otro, tabata tin un grupo grandi cu a sigui e curso hydroponic chikito, y algo bunita p’e ta cu e mes ta den un group chat y e por a constata cu nan a traha basta actividad. Tambe nan tabata tin basta proyecto escolar, bishita di gruponan interesa pa haya mas informacion, departamento di enseñanza cu full su team cu a bishita nan e aña aki, y otro departamentonan tambe, aworaki, ta basta interesa den e tema di plantacion.
Pa locual ta crianza di bestia Santa Rosa tin hopi mas bestia aworaki, di miho calidad, e test cu nan a haci cu diferente plantacion y matanan local, a bay hopi bon, y nan mes a wak’e pasobra Santa Rosa mes ta haci uso di su plantacionnan pa duna e bestianan cuminda.
Nathalie Maduro a indica cu nan mes por duna ehempelnan na e criadornan, con nan tambe por abastece nan mes, con nan tambe por abastece nan mes door di planta cierto productonan cu ta halto den proteina pa e bestianan.
“Algo cu tambe tabata un highlight tambe pa Santa Rosa, cu nos a logra pa prome biaha ta cu un grupo di Scol SPO a haya full un module over di cria di bestia. Ta prome biaha cu esey a tuma lugar. Nos ta spera cu nos por sigui cu esaki tambe, pa otro clasnan den futuro y otro scolnan cu kizas ta interesa”, Maduro a señala.
Pa loke ta trata e parti di pesca, el a bisa cu recientemente nan tabata tin un reunion cu e Minister y tin diferente proposicionnan pa cambionan di ley cu ta pendiente den e departamento huridico di gobierno, pa nan por duna nan input” directora di LVV a menciona.
El a subraya cu por mira cu esaki tabata un aña cu logronan positivo . Siman pasa, tambe a firma un MoU cu Xavier University y di nan tambe Santa Rosa ta bay haya mas ayudo pa e parti di crianza, no solamente pa Santa Rosa pero tambe pa e criadornan pafo, cu hopi biaha ora cu nan bestianan ta malo, e ta costoso y no ta facil pa yega na un veterinario asina sin mas, talvez pa falta di conocemento vooral pa e tipo di bestianan cu nan tin.
“Y no mester lubida cu na Mei nos a firma un MoU cu tur e seis islanan Hulandes y mi por bisa cu Aruba tabata encarga cu e Comision di Certificacion pa e Cunukeronan, y tin control di calidad di con esaki a tuma lugar”, Nathalie Maduro a señala.
