Problema di grandinan ta bay mas leu cu bida mas largo di hende
*Plataforma nacional los di politica mester atende cu un asunto serio
*E pensionado soltero of cu necesidad di cuido ta e problema social real
ORANJESTAD (AAN) — Eleccion a bati na porta y atrobe por mira con politica ta trata na haci uzo di emocion di Pueblo, basa riba problemanan humano cu ta presenta.
Durante eleccion cielo ta wordo priminti na votadornan dor di manipuladornan politico.
Berdad ta keda cu pa por duna Pueblo servicio y beneficio, Gobierno mester ricibi placa di Pueblo.
E berdad aki ta presente pa cuminsa cerca politiconan mes, cu ta aumenta den cantidad na momento cu tin mas cos pa parti si nan ta den Gobierno, manera actualmente ta e realidad di Aruba despues cu Gobierno Evelyn Wever-Croes a percura pa recuperacion.
Historia a entrega prueba tambe cu ora mishi cu cierto dolornan di Pueblo, voto por aumenta. Esaki a mira ora AVP a bay redobla pensioen di behez pa haya voto, loke a duna nan su resultado politico.
E dolor di e fondo a wordo atende dor di profesionalismo di director di SVB, Edwin Jacobs kende a scapa e fondo di pensioen tambe ora Covid-19 a bati na porta.
Berdad ta cu awe sin mas ni e mihor experto por bay haci milager sin subi prima drasticamente of introduci otro areglonan den cual ta bay mishi cu pago indirecto for di fondonan di entrada di belasting.
Nos sistema legal ta basa riba responsabilidad di comunidad.
Un familia, manera semper a mantene, tin un sistema di responsabilidad legal propio.
Mester bini control riba situacionnan familiar ya cu mas y mas ta nota e tendencia cu mayornan di edad cu capacidad pa hiba un bida independiente cu asistencia cu un yiu mester duna su mayornan, mester bay cas di cuido, cu nan no mester y ta costa comunidad placa y e vivienda prome cu nan muri ta bay pa nan heredero.
Un asunto cu sigur mester wordo investiga ora ta trata di grandinan soltero, cu herederonan cu prome cu e grandinan muri, kier ta doño di nan propiedad, pero sin e responsabilidad pa duna e grandinan loke nan mester pa nan por sigui biba.
DIARIO durante henter su historia a atende cu e relatonan dramatico di adultonan mayor cu ta bira victima di yiunan adicto na droga of alcohol, cu ta destrui e base di bida material di nan mayornan.
Un grandi cu cas propio; un grandi cu seguro pa biehez; un grandi cu un pensioen adicional, den temponan moderno, mientras maleza cu ta paralisa nan bida no presenta, por sigui biba den nan vivienda sigur cu tanto organisacion cu ta dedica tempo na nan.
Ora sigui desaroyonan internacional, ta mira con na varios pais cu scarcedad di vivienda, parehanan hoben ta yega na un areglo cu nan mayornan pa nan construi un cas propio riba e tereno familiar.
Esaki ta hiba Aruba na e modelo Arubano di pasado, caminda un pareha cu ta prepara pa matrimonio, ta construi nan cas riba tereno di familia prome cu nan casa.
Mester tene cuenta awe tambe cu e realidad, cu ya e sistema di pensioen di behez conoce un existencia di tanto aña, cu ta haci cu e persona cu awe ricibi pensioen di behez, generalmente for di e momento cu el a ricibi su prome salario, a paga prima di pensioen di behez.
Balor di placa a devalua na un mundo di consumo pero tambe e pakete y nivel di bida cu e persona di edad mas halto kier sigui, pa tur edad a conoce aumento.
E problemanan produci riba tereno di pensioen di behez tin demasiado punto di entrada, cu ta cuminsa cu e pensamento eroneo di hoben mal informa cu nan mester paga pa pensioen di grandinan cu awe pues durante hunter nan bida, pa un gran parti a paga nan propio prima y tin tur derecho riba nan placa.
Central sinembargo den e pakete di maneho di grandinan, ta keda e hecho cu politiconan cu ta busca voto, no mester abusa di e voto cu nan por haya di grandinan pa asina nan bay cobra placa den Parlamento.
E sistema profesional cu Director Edwin Jacobs a a aplica den maneho di SVB, ta base pa yega na un plataforma nacional, den crecemento di aspectonan importante pa poblaciion, manera discrepancia di entrada di e poblacion di adulto mayor segun e pais caminda nan a paga pensioen di behez y sigur e problema di adultonan mayor cu forzosamente ta bolbe Aruba for di Hulanda, caminda no solamente e entrada pero tambe e realidad di bida y loke ta ricibi como base generalisa di bida, ta diferente.
E aspectonan mara na e aumento di cantidad di adulto mayor den comunidad, ta mucho mas amplio cu loke brilnan politica ta permiti hende mira y ta visibel cerca e cantidad di Arubianonan, cu aunke nan ta ricaba un suma mas halto na Hulanda, no por biba cu e suma aki na Hulanda cu un costo di bida mas halto y e condicionan di bida na cual nan ta wordo mara.
