ORANJESTAD (AAN) — Instituto Biba Saludable y Activo (IBiSA) a yama un conferencia di prensa,
den cual a elabora tocante e careranan cu lo tuma lugar pa 2025, cual esun di “Betico Memorial Run” ta e prome.
Rafael Perez, Coordinador di evento pa IBiSA, a menciona cu un aña mas ta bin cu e carera clasico “Betico Memorial Run” cu ta un di e prome careranan di aña cu comunidad conoce, y IBiSA kier a presenta esaki.
El a menciona un cambio so, cu ta bay tin pa e carera aki. El expresa si, cu pa nan careranan clasico nada a cambia: ekipo a keda igual, tambe e aparatonan y Turibana. Interesadonan por registra pa cualkier categoria.
“Unico cos cu nos a trece un otro elemento nobo na dje, y cu un carera nobo y e elemento nobo cu nos a trece pa engrandece e gana di participa y competi, ta e ‘Run the island’ Esaki ta cu participando na tur cuater carera bo ta haya e oportunidad di cay den premiacion na final di esaki. Tin premiacion pa e distancianan di mas largo den adulto y si participa den tur cuater bo ta cay den participacion y oportunidad di gana premio”, Perez a informa.
El a agrega cu si bo participa na tur cuater carera pa competi of pa ta saludable, na final di dia bo ta haya un medaya, y si participa na tur cuater e medayanan aki hunto ta forma un silueta di Aruba completo, y esey ta e “collector’s item” cu nan ta bin cu ne, Rafael Perez a menciona. El a reitera cu esaki ta e unico cambio of elemento nobo pa haci e careranan aki mas emocionante y haci e participacion mas grandi, pa e careranan.
El a señala cu esnan cu kier participa den forma individual esey tambe ta posibel. Perez a reitera cu Betico ta e prome carera di aña y tin lugar pa mil participante, cu ta conta pa tur e careranan di IBiSA, cual tin distancianan di 10 kilometer, 6 kilometer y e categorianan di mucha cu ta 3 kilometer: 1.5, 800, 400 y 200 meter. Registracion ta habri y pa esun di Betico Memorial Run ta haya registracion pa tur carera y na miho prijs.
