Gobierno a aloca fondo pa drecha caminda y e tin confianza den e proyecto irisGO presenta pa DOW

Premier Evelyn Wever-Croes:

ORANJESTAD (AAN) – Minister Presidente, Evelyn Wever-Croes, a expresa den entrevista cu DIARIO, cu mientras gobierno ta trahando a aloca fondo pa por drecha e camindanan na Aruba, importante ta cu Departamento di Obranan Publico (DOW) por handle e trabao tambe.

El a subraya cu no ta placa ta e unico problema, sino e capacidad tambe. “Y ora cu nos a sinta cu DOW bisa nan cu nos ta bay crea fondonan structural pa tur aña, por lo menos 18 mil florin pa por drecha careteranan na Aruba, cu ta den presupuesto multi-anual, e ta importante pa DOW maneha esaki”, e mandatario a indica.

El a agrega cu ora DOW a inform’e tocante e proyecto irisGO (Integrated Road Infrastructure System) cu nan a topa cu ne, un tempo pasa, y cu ta un manera hopi innovative di haya e informacion, e aparato ta den auto y ora e auto ta core e ta capta kico ta e caminda of acera cu mester wordo drecha, y ki tipo di trabao mester haci.

“Dus, e ta duna bo cierto bista y a base di esey nan ta traha un work-order, y a base di esaki DOW ta haci un inspeccion pa wak mes kico mester wordo haci, anto e ora ey e trabao ta wordo clarifica”, Prome Minister a señala.

El a indica tambe cu si ta trabaonan chikito por bay lihe, si ta trabaonan grandi mester busca mas ekipo, mas material, etc. “Dus, e ta un tool, bo ta bay yuda DOW planifica na un forma mas sofistica den futuro, y atende cu e problemanan mas lihe. Manera nos a bisa, nos ta den un posicion aworaki unda nos a crea espacio financiero pa inverti den nos careteranan. E placa tey, aworaki cu e aparato aki mi ta mas confia y sigur cu e trabao ta bay wordo haci, tambe”, Minister Presidente, Evelyn Wever-Croes a duna di conoce.