Den un situacion di dos guera peligroso cu tension mundial
- For di 2019 DIARIO a bati alarma cu ta resona awe na Cas Blanco
- Nacionnan Uni en busca di e cuadro di Ley pa mente di robot
ORANJESTAD(AAN)- Con ta duna contenido na e vigilancia di bienestar di hende?
Esaki ta e pregunta grandi cu lidernan mundial ta haci nan mes y cu ta culmina na 2023, manera ya na Augustus DIARIO a trece dilanti mientras riba plataforma internacional contestanan importante ta wordo busca.
Na final di 2019 DIARIO a bati alarma pa un grabacion internacional cu a haya e nomber di “The Age of AI”, cu tabata splica desaroyonan riba tereno cientifico cu tabata permiti desaroyo di sistemanan cada rato mas avanza cu por amenaza e capacidad mental humano.
E entrada di Covid-19 a pone un fin na e atencion mundial cu e tema a cuminsa haya pero na mes momento a entrega e prueba di beneficionan di uzo di sistemanan computerisa avanza, cu a yuda hende confronta e pandemia Covid-19.
A base di informacionnan cu tabata wordo procesa cu asistencia di tecnologia moderno, informacionnan valioso por a wordo computeriza y haci posibel pa mundo a uni den e guera contra Covid-19.
Resultado tabata un aceleracion di practica di inteligencia artificial, cu realmente tabata presente den e prome sistemanan computerisa cu ta asisti hende den e calculacion di cifranan mas facil por ehempel te e compilacion di resultadonan di data cu hende ta acumula.
Na 2023 DIARIO a presenta un serie di articulo den cual pa cada sector a analisa e avance di Inteligencia Artificial na momento cu ya Nacionnan Uni a bini hunto pa no solamente mustra riba e beneficionan di avance tecnologico pero tambe e problemanan cu e ta representa.
Mientras aplicacion di inteligencia artificial ta sigui desaroya, mas y mas por mira con mundialmente conferencianan ta wordo teni pa atende cu e topico aki pero tambe pa papia di e peligernan grandi cu e ta contene.
Asuntonan cu mester keda discuti na e conferencia internacional cu ta tuma lugar na Reino Uni proximamente den cuadro di loke e Conseho di Seguridad di Nacionnan Uni a atende como “Responsabilidad pa Futuro Generacionnan”debi na e peligernan tambe cu ta wordo entrega no solamente den e cantidad di cupo di trabou cu e por afecta, pero otro aspectonan cu mester tene na vista.
Tin hopi resistencia por ehemplo contra e hecho cu riba tereno di inteligencia artificial sentimentonan humano no ta conta ni tampoco e papel cu nan ta hunga na momento determinante.
Un ehempel clasico ta riba plataforma internacional e forma cu hende ta capaz pa pone un auto participa na trafico sin un chauffeur.
E auto ta programa pa enfrenta tur tipo di peliger di trafico pero no ta programa pa mira con un persona ta dicidi di cruza e caretera na momento cu e vehiculo ta acerca.
Detayenan importante cu mester tene na vista cerca un grupo creciente cu tambe ta contra problemanan cu e desaroyonan ta trece pa e calidad di bida humano.
Seguridad ta hunga un aspecto sumamente importante pa nacionnaan debi na e forma cu Inteligencia Artificial ta haci posibel pa seguridad nacional wordo confronta cu problemanan serio.
Durante e conferencia cu a wordo tene na Juli, diferente robot cu un aspecto humano a wordo presenta cu un mensahe pa splica hende cu nan no ta forma peliger pa e ser humano ni su pais.
Sinembargo, e peligernan cu paisnan mester tene na consideracion den e avance di Inteligencia Artificial, mester di atencion cu nan ta ricibi continuamente den conferencianan, manera tambe lo wordo tene proximamente na Aruba y na nivel mundial na Reino Uni caminda informacion importante lo wordo intercambia.
Secretario di Estado di Reino Hulandes, Alexandra van Huffelen tambe lo ta presente na e Conferencia na Reino Uni, caminda lo papia di e peligernan pa seguridad nacional cu ta sigui crece a base di Inteligencia Artificial na momento di un situacion sumamente explosivo pa mundo.
Kico Inteligencia Artificial realmente ta pone na peliger na un mundo cu ta enfrenta dos situacion alarmante? Con Inteligencia Artificial ta kibra seguridad nacional na momento cu tanto na Ukraine como na Medio Oriente por papia di situacionnan explosivo?
Mundo ta prepara pa sinta na mesa pa discuti e progreso cu Inteligencia Artificial a conoce, pero tambe pa atende loke for di e encuentronan den pasado y sigur di Nacionnan Uni na 2023 a bini dilanti, cu ta seguridad nacional, di empresanan y di hende cu Inteligencia Artificial ta pone na peliger.
