BIRMINGHAM: Despues di a oficialmente confesa den Corte cu na Mei 2005 el a mata Natalee Holloway riba un beach na Aruba, y cu despues a wordo condena pa caso di extorsion di e mama Beth, a sali bek rumbo pa Peru.
E homber di 36 aña di edad naci na Hulanda, kende a admiti culpabilidad di extorsion y fraude electronico den Corte Federal na Alabama algun siman pasa, a wordo saca di Shelby County Jail riba Dialuna marduga net poco despues di 12’or di mey anochi.
El a wordo escolta door di US Marshals, y nan a hibe for di e prison directamente pa Birmingham International Airport. E avion a lanta vuelo rumbo pa Peru. Unavez e yega na Lima, oficialnan Peruano lo tume bek den custodia pa e sigui sirbi e resto di su castigo di prison pa asesinato.
“US Marshals Service Northern District of Alabama ta gradici Shelby County Sheriff John Samaniego, y Hefe di Polis di Hoover, esta Nick Derzis pa nan asistencia pa keda cuida Joran van der Sloot mientras e ta den custodia di United States Marshals Service,” un oficial Marty Keely di US Marshals a declara.
Huez a impone un castigo di 20 aña di prison na cada un di e dos condenanan na Alabama. E castigonan aki lo wordo cumpli simultaneamente cu su condena di 28 aña pa asesinato na 2010 di e studiante Stephany Flores na Peru.
Como parti di su acuerdo cu Fiscal na Alabama, el a wordo rekeri pa bisa famia Holloway con Natalee a fayece, y unda su curpa a wordo benta. Agentenan di FBI a bisa cu el a pasa un test polygraph (pa detecta mentira), y e mama Beth Holloway a bisa cu e tin confiansa den e detayenan di su confesion.
E acuerdo a stipula tambe cu Joran van de Sloot tin di paga Holloway e suma di $25.000.
Mata Natalee cu bloki cement: Parti di e confesion di Joran a wordo divulga na publico, despues cu el a declara su mes culpable. El a bisa cu el a scop Natalee den su cara y despues a dal su cabes cu un bloki di cement ora cu e mucha muher a rechasa su intentonan sexual.
“Ora cu el a dal mi cu su rudia den mi marti delicado, mi a lanta para na e beach, y mi a scop’e extremadamente duro den su cara,” su confesion ta indica. “El a cay abao fo’i tino, kizas hasta morto, pero sigur fo’i tino.”
El a bisa cu e ora el a dal su cabez cu un bloki di cement cu el a haya y a pone su curpa den lama. “Mi a drenta lama te na mi rudia, y mi a pushe bay den lama. Despues di esey mi a sali, y mi a cana bay cas”.
“Porfin finalmente bo a admiti, cu bo a mate,” Beth Holloway cu cara tur na lagrima a bisa den Corte.
“Bo a caba cu su soñonan, su potencial, su posibilidadnan ora cu bo a mate na 2005,” Holloway a bisa despues cu Joran a admiti culpabilidad.
“Bo no a haya loke bo kier a ricibi di Natalee, bo satisfaccion sexual, pues bo a mate brutalmente... Bo ta esun na Aruba cu ningun hende kier ta, e mancha preto riba e isla,” el a bisa.
Beth Holloway a bisa cu despues cu Natalee a wordo mata, cu Joran van der Sloot a bay cas y a mira pornografia.
“Mi kier a tuma e oportunidad pa pidi disculpa na famia Holloway, pa pidi disculpa na mi mesun famia, pa bisa cu mi ta spera cu e declaracion cu mi a duna lo trece un final na e capitulo y pa tur hende envolvi,” van der Sloot a bisa.
Joran van der Sloot a declara cu awor el a bira un Cristian. “Mi no ta mas e persona cu mi tabata e tempo aya.”
Ora cu a puntra Beth Holloway pafo di Corte na Alabama, si e ta spera cu Ministerio Publico na Aruba awor lo acusa Joran van der Sloot den morto di Natalee, el a declara: “Cu suerte, kizas, nan lo investiga. Pero ami mes ya tin loke mi tabatin mester.”
A wordo publica ampliamente cu debi na e ‘verjaringstermijn’ pa asesinato na Aruba ta 12 aña, ta poco probable cu Joran lo wordo acusa y procesa pa e asesinato di Natalee.
Ta conoci cu e dia despues cu Joran a haci e confesion, cu Procurador General na Aruba a pidi Departamento di Husticia di Merca, pa nan por haya tur detaye di nan investigacion di Joran van der Sloot. Esey ta loke Ministerio Publico na Aruba mes a admiti. Nan lo revisa e detayenan aki di autoridad Mericano, prome cu dicidi ki paso hudicial Aruba lo bay tuma.
