Cabesante Erwin Lopez:
ORANJESTAD (AAN) – Cabesante di EPB-Oranjestad, señor Erwin Lopez, a señala cu no ta asina cu tur dia tin problemanan grandi na scol. El a acentua cu security gardnan tey pa yuda preveni problema, pero ora un problema start e ta bira un tiki dificil pa par’e, apesar cu den cura di scol nan ta par’e.
E docentenan ta yuda trece orden bek y e securitynan ta asisti e docentenan. Pero e problemanan cu tin den sociedad y cu mester di ayudo en realidad ta algo cu mester bin, meneer Lopez a expresa, agregando cu por weita con e violencia ta escala den e comunidad.
Lopez a señala cu tin hopi mucha ta den gang, pero den scol mes por tin 30 cu ta problematico y ta duna hopi dolor di cabes. 30 alumno problematico ta 3% di e studiantenan di EPB-Oranjestad. E cabesante a yega di papia cu nan mayornan, y nan tin cu bolbe yama nan masalmente, na reunionnan, pa informa nan kico ta pasando y kico scol ta spera di nan. Mester corda si, cu hopi mayor ta traha for di 6’or di mainta te 5’or di atardi, y tin hopi mucha cu ta na cas nan so.
Mucha ta cria mucha, pero e mayornan tin cu haci mas esfuerzo ainda, pa re-educa of guia nan yiunan miho. E pregunta ta, con leu por forza un mayor bin. E ta su obligacion como mayor, pero scol no por forc’e bin, y esey ta e discusion. Un mayor conciente ta bin scol no solo pa haya informacion riba problemanan, pero con su yiu ta studia tambe.
Tocante e tipo di armanan cu scol ta detecta den poder di algun alumno ta hopi arma blanco manera cuchio di largo te cuchio chikito. A yega di bisa cu tabata tin un arma di candela na scol, pero nan no a haye nunca. Cabesante señor Lopez a bisa cu nan a busca esaki activamente, pero no a hay’e. Pero nan ta haya diferente arma pa hinca.
Lopez a duna di conoce cu nan tin algun camara, y tin un proyecto grandi cu mester wordo ehecuta na Aruba, cu diferente scol y areanan. Esaki ta camaranan cu lo wordo monitorea na un caminda central. “Mi a compronde di Minister di Husticia cu esey ta canando, e ta bezig cu e bestek y mi a wordo bisa cu por pega e camaranan na scol mes, locual lo yuda hopi, pasobra si nan sa cu nan ta wordo filma nan lo tin mas cuidao. El a agrega cu no ta solamente arma blanco ta wordo detecta na scol, pero tambe droga cu ta na tur scol”, Cabesante Erwin Lopez a subraya.
