*Uso di tapaboca ta keda un prerogativa di e doñonan di negoshi - ORANJESTAD (AAN) – Sharline Koolman, Hefe di DBZ, den ronda di pregunta den e conferencia di prensa relaciona cu e actualidad di Covid-19 na Aruba,
y e medidanan cu ta bay wordo flexibilisa, a splica cu uso di mondkapje ta prerogativa di e doñonan di negoshi, si e personal por traha sin tapaboca, of ta exigi e clientenan pa uza esaki.
No tur personal di un negoshi a vacuna, pa un of otro motibo, y e ora ey pa evita cu por bin un outbreak atrobe, pasobra aunke sea chikito e por presenta, e doño por dicidi cu den su negoshi mester bisti tapaboca y e sa pakico e ta pidi esaki y DVG no ta bay mete den esaki, Koolman a subraya.
Esaki ta conta pa Departamentonan tambe cu tin hopi publico cu ta drenta sali di e lugar, pa e por proteha pasobra no tur hende na Aruba a vacuna.
Sharline Koolman a remarca cu DVG a bin na e conclusionnan aki, mirando cu si casualmente e casonan mester subi (ohala cu no), pero ta mira cierto tendencianan, nan lo tey pa implementa medida y si mester, e mondkapje lo bin bek.
DVG no ta obliga ningun hende use aworaki, pero si ta stimula personanan cu tin cancer, of un sistema immune abao, keda use aunke cu nan ta vacuna, pa e simple motibo cu nan resistencia ta hopi mas abao.
E Hefe di DBZ a acentua cu e medidanan ta wordo tuma a base di e situacion cu ta presenta, esta si ta baha nan of no, pero e poblacion mester realiza cu si acaso tin casonan ta tuma medida, sinembargo, na momento cu e hendenan ta vacuna y e casonan ta bahando, mester kita e medidanan bek.
Di otro banda, Sharline Koolman a expresa cu pa ta sincero, Departamento di Salud Publico y varios colega di Crisis Team, tambe ta di opinion cu mester keda wanta mas tanto posible, cierto medidanan pa cu eleccion, pa evita cu despues di eleccion por haya un outbreak door di personanan cu no a vacuna ainda.
Un siman despues di eleccion ta bay monitor si e casonan a keda hopi abao of si tabata tin pecknan caba.
Koolman a bisa cu nan por kita mas cos, pero e variante Delta no ta permiti pa elimina mas medida, por ehemplo, e seguro pa e hendenan cu ta bishita Aruba, si ora di drenta hendenan ta bin sin vacuna, si ta bay check esaki of ta bay check PCR, pues tin hopi aspecto mas den sentido cu e set up na aeropuerto “ta full un set up”. No por kita tur cos no solamente pa e variante Delta sino pasobra hopi mas ta biniendo y no por kita afo cu e momento por yega cu tin 30 variante.
