Payroll Pro HRM a celebra nan di 30 aña na Curaçao

ORANJESTAD (AAN): Informe recien procedente di Willemstad, ta indica cu e ekipo di Payroll Pro HRM na Curacao a celebra conhuntamente cu nan clientenan e di 30 aniversario di Payroll Pro HRM.

   E celebracion aki cu a cuminsa 6or di atardi a tuma lugar na Infinity Beach na Renaissance Wind Creek Curacao Resort. E invitadonan por a scucha un presentacion di parti di Christopher Middelhof, director di CJM Academy unda el a trece dilanti e tema di proposito den e area laboral.

   A sigui e anochi cu un brindis pa celebra e aniversario di Payroll Pro HRM y esaki a worde duna door di Brachelo Regina, director di Payroll Pro HRM. Den e brindis aki a gradici tur cliente y partners pa nan apoyo y confianza pa 30 aña largo.

   E anochi a sigui cu snacks, bebidanan y e oportunidad pa network y conoce diferente profesionalnan di e isla.

   Brachelo Regina ta comenta “Nos ta contento di por a organiza e anochi aki pa nos clientenan. Door di nan apoyo y sosten nos por a yega na e milestone aki.”

Ademas, Payroll Pro HRM ta duna un danki na Nayda, Roseanne y full e ekipo di Renaissance Wind Creek Curacao Resort pa e tremendo servicio brinda na e invitadonan e anochi aki.

   Payroll Pro HRM ta compromete su mes pa sigui innova y brinda e mehor servicio na su clientenan na Curacao y demas mercadonan internacional.