ORANJESTAD (AAN): Directie Natuur en Milieu a duna di conoce cu 𝐑𝐨𝐠𝐚𝐧𝐬 ta un sorto di parha di lama.
E sorto di parha aki na Ingles ta yam’e ‘Brown Pelican’ di e famia Pelecanidae. Su nomber cientifico ta 𝘗𝘦𝘭𝘦𝘤𝘢𝘯𝘶𝘴 𝘰𝘤𝘤𝘪𝘥𝘦𝘯𝘵𝘢𝘭𝘪𝘴. E ta un di e tres parhanan cu ta gara nan cuminda door di duik den awa. Nan ta come mas tanto piskechi. E ta un parha cu ta hay’e mas tanto na lama of ta drumi den palonan di mata band'i lama.
E rogans tin un plumashi blanco na su cabes y garganta y na su corona di cabes e ta poco mas geel. Na e parti di su lomba y nek ta color maron y na su rabo poco mas shinishi. E rogans hembra y e macho ta similar numa cu e hembra ta poco mas chikito. Rond di su wowo por ta color ros y nan wowo ta bira mas shinishi den temporada di broei.
E rogans ta un di e parhanan di lama di mas grandi, e ta robusto, e ta midi, 1 meter pa 1.52 meter di largo y tin un ‘wingspan’ di 2 pa 2.25 meter y e por pisa entre 2 pa 5 kilo. Mescos cu e otro parhanan di famia pelican, e rogans tin un piek largo cu ta midi te 30 centimeter y tambe tin manera un saco bou di su piek, su buchi. Su curpa ta mas tanto maron y su pianan ta varia di color dependiendo di e temporada di broei.
Por wak e parhanan aki den area di saliñanan y drumi den matanan di mangel na costanan cu ta trankil. Rogans ta un parha cu ta bula y biba hunto den grupo. Nan por bula entre 18 y 20 meter halto y toch wak grupo di pisca pa nan busca nan cuminda. Nan ta traha neishi den areanan scondi, nan ta pone 2 te 4 webo den forma oval. Pero ta un yiu so nan ta cria. E webo por midi te casi 8 centimeter y e webo ta tarda 30 dia p’e broei.
Rogans embra y e macho ta yuda tene e webonan cayente cu nan pia, pa asina e broei. Un rogans ta haya di come te ora cu nan ta casi 10 luna bieu. Locual nan ta come ta cuminda parcialmente digeri for di e boca di nan mayor. Un rogans a yega di biba den captividad te casi 30 aña.
E menasa pa e webonan di rogans ta cacho, pushi, yuwana y parhanan grandi cu ta busca e webonan pa kibra y come. Tambe na lama e menasa ta tribon, cu por hap e pianan di e rogans cu ta colga ora cu e ta zweef riba superficie di lama.
Hende tambe ta otro menasa pasobra cada biaha tin mas actividad humano cant'i of riba lama cu botonan y no ta duna e parha su trankilidad. Tambe, hende a desaroya mucho band’i lama cu edificionan y a kita matanan. A keda poco habitat pa e rogans por procrea.
Fuente: Facebook Page Directie Natuur en Milieu
