Paul Hilbers di IMF cu palabra di elogio pa recuperacion financiero y economico di Aruba

Durante reunion cu Ministronan

• A mira con tin surplus y debe di e isla ta bahando
• Tin stabilidad monetario y financiero 

ORANJESTAD (AAN): Diamars mainta Conseho di Ministronan a ricibi bishita di Executive Director di IMF sr. Paul Hilbers kende tabata tin palabra di elogio pa e manera impresionante cu Aruba a bin ta recupera di e pandemia di Covid-19.

  Sr. Hilbers ta forma parti di e board di IMF y a indica cu Aruba ta goza di un bon reputacion cerca IMF. Aruba su economia ta bayendo bon, finansa publico ta worde maneha basa riba surplus, e debe di Aruba ta bahando, tin stabilidad monetario y financiero, e sistema financiero ta integro y Aruba ta trahando caba pa por mitiga efectonan di cambio climatico. Ta puntonan hopi positivo cu ta worde mira pa wowo di inversionistanan internacional y tambe pa e turista cu ta scohe pa e stabilidad cu Aruba ta ofrece como destino turistico.

   Esaki sigur ta bon noticia pa Aruba y ta e resultado di trabao duro y serio cu a worde haci pa nos hendenan di Aruba. Minister Maduro di Finansa kier gradici y felicita su ekipo financiero, colega Ministernan, Parlamento y Aruba henter pa e mensahe positivo aki cu ta keda treci pa e Executive Director di IMF.

   Aruba por ta orguyoso di loke tur hende como comunidad ta logrando na bienestar di e isla.