Peliger personal y problemanan serio pa economia nacional
*Deshaci di tur posibilidad di creacion di atentado contra economia
*Voznan ta lanta pa autoridad elimina tur posibilidad di manipulacion
ORANJESTAD(AAN)—“Un investigacion profundo mester tuma lugar pa determina kico ta pasa realmente den sector di energia di Aruba, cu no hopi tempo pasa, mester a atende cu e sector vital pa comunidad pa motibo di problemanan cu ta surgi.”
Esaki ta parti di informacionnan cu DIARIO ta ricibi di publico na Aruba, cu ta sumamente preocupa cu e situacion di electricidad, cu ta pone henter e pais actualmente na peligro.
“Na e momentonan aki, autoridad mester interveni pa deshaci completamente di tur posibilidad cu e situacion na Aruba ta debi na problemanan cu ta presenta nan mes pa motibo tecnico of di e planta di produccion, of cu aki ta trata di cualkier peliger di caracter diferente pero pa sirbi interes desconoci,” informantenan ta splica.
A wordo indica na DIARIO cu no ta un eternidad a pasa for di e momento cu produccion di energia na Aruba, tabata discusion importante den seno politico di e pais, cu indirectamente ta dicidi pa e sector aki mescos cu pa otro sectornan cu ta conoci como empresanan di Gobierno, ya cu nan ta propiedad di Pueblo.
Aruba den pasado tabata conoce problemanan di coriente na diferente momento, pero por a papia e tempo directamente por ehempel di instalacionnan cu por tabata productor di problema debi na nan edad y tempo cu nan ta den uzo.
Sinembargo, e situacion cu ta presenta awor, ta crea cerca Pueblo cu ta doño di e companianan cu mester garantisa su bienestar, cu nan mester ricibi e garantia cu no tin nada robez den e mundo di energia, cu ta afecta e calidad di bida di ciudadanonan pero tambe henter economia cu a tuma tanto tempo pa recupera.
“Aruba ta pasa den un epoca carga cu elementonan politico, cu por causa prome cu eleccion 2024, problema serio pa e poblacion pa asina por afecta e resultadonan electoral na e pais, cu lo bay eleccion 2025 cu un panorama completamente diferente for di loke lo por a wordo spera despues di Pandemia y e recesion mundial,” a bini dilanti.
Manera a wordo declara, no ta tur hende ta contento cu Aruba ta den un situacion stabil mientras rond mundo señalnan ta wordo duna, con leo politica por yega, pa haya poder.
Segun informantenan, e situacion actual di coriente, ta afecta henter comunidad, na prome lugar sigur pa trahadornan di e planta, cu mester traha horario extra pa asina restablece problema cu ta wordo crea.
“Hopi di e trahadornan ta traha segun schedule, ya cu sigur e departamentonan tecnico, no tin horario fiho. Ora tin problema na nan cas tambe, nan famianan tambe ta sufri di un situacion cu ta cansa henter Aruba,”a bini dilanti.
Di parti di Gobierno por a scucha ayera con tur intento a wordo haci y ta wordo haci pa evita problemanan na e planta di electricidad di Aruba, cu un economia cu ta depende di turista cu ta bira victima di black out y ta bira tambe mal propaganda pa e turismo di Aruba.
Mientras Gobierno Wever-Croes a mustra con e pasonan a wordo tuma pa pone fin na problemanan na e planta di coriente, informantenan ta considera na su lugar, pa pidi un comision di Reino si ta necesario, bin investiga kico ta pasa na e planta di awa y energia di Aruba cu ta mira bienestar di su Pueblo y tambe su economia na peliger.
“Aruba ta den porta di un eleccion. Cu Aruba, mescos cu tur pais ta confronta e calor ocasiona pa cambio di clima, ta conoci, mescos cu e hecho cu e exigencia pa mas coriente ta presente,”ta bini dilanti. Pero cu di ripiente e situacion manera actualmente ta e caso, ta presenta, ta wordo considera exagera.
Informantenan clave ta mustra, cu den e cambionan cu mundo a conoce, sigur ta bon pa introduci cuerponan independiente, cu por realisa investigacionnan cu por garantisa cu companianan vital di Pueblo mescos cu tur loke por afecta economia directamente, periodicamente wordo revisa y entrega na Pueblo di Aruba rapportnan cu ta asegura e bienestar di e companianan y Pueblo di Aruba.
Tambe mester cuminsa mira con ta atende cu e termino di “compania di Gobierno”, cu ta companianan cu ta propiedad di Pueblo y pasobra nan ta compania independiente, lo no por tin e control cu propiedad di Pueblo merece.
DIARIO ta den contacto directo cu informantenan riba e situacion cu por considera sumamente grave pa economia di Aruba y bienestar di su ciudadanonan.
