Paul Croes a sali desapunta for di Corte despues di a scucha su sentencia

ORANJESTAD (AAN) – Ex-minister Paul Croes, a declara pa prensa cu el a sali for di Corte un poco desapunta, despues di a scucha e sentencia.

El a splica cu despues di un sentencia di cinco aña di detencion a baha na cuater y nan a hacie awo tres, cu sigur ta un adelanto pero no locual a wordo premira. “Mi ta sinti cu basta cos cu nos a trece padilanti na e tres hueznan, no a wordo teni na consideracion. Mi a lesa un rato e sentencia y hopi cos a wordo tuma ‘kort door de bocht’, pero na e momentonan aki lo mi haci un evaluacion cu mi abogado, hunto cu mi famia, kico ta e miho decision pa sigui aworaki”, Paul Croes a expresa.

El a reitera cu nan ta personanan luchado y lo keda lucha. Croes a subraya cu sigur nan no ta contento cu e sentencia aki, pero e ta hopi contento cu su señora tambe a duna un declaracion y el a keda liber di locual nan a acuse di dje; nan a lastre den e caso aki y awo el a haya razon for di e tres hueznan.

“Esey, seguramente, ta un consuelo pa nos. E ta algo positivo, pero nos lo bay evalua un rato pa ki motibo, por ehemplo, e tres hueznan no a tuma den consideracion e nobenta dianan cu mi a keda den isolacion, erornan haci door di Ministerio Publico, e embergadura di e caso aki mes tambe, y tur esey nos kier bay discuti e momentonan aki, cu nos team di abogado pa mira si ta keda espacio, pa un siguiente paso”, Croes a comenta.

El a menciona cu e no kier divulga nada mas na e momento aki, ya cu apenas un rato prome e sentencia a wordo lesa. Croes a subraya cu el a keda straña cu e sentencia na haltura di e caso pero nan ta soldat y no ta muri, nan ta keda lucha.

El a expresa cu nan sa cu na e momentonan aki tin hopi hende na Aruba cu ta pasando den situacionnan hopi dificil, y aunke e no ta bisa cu su caso ta facil, absolutamente, si pone den perspectiva e ta duna nan animo pa sigui pa dilanti.

“Esey ta e mensahe cu mi tin, en todo caso, pa henter nos pueblo. Den un situacion malo cu bo por ta pasando aden, nunca, nunca give up. Semper sigui lucha”,  Paul Croes a subraya.

Melony Croes, casa di Paul Croes, tambe a duna un declaracion pa prensa, y a bisa cu Ministerio Publico no a apela contra dje, pero e si a apela bek contra nan, pasobra e no ta dispuesto di paga ni un ora pa algo cu e no a haci.

“Y esaki a wordo confirma awe dilanti tres Huez y mi ta wanta mi declaracion te aki”, e dama a expresa.