Republica di Banana ta nomber di paisnan manca pa corupcion - *E realidad di e veredicto di Corte di Husticia den caso Paul Croes - *Escandalonan politico ta exigi un cambio den moral politico local
ORANJESTAD(AAN)—Democracia a bira uno di e palabranan mas popular den mundo politico.
E realidad aki no ta nifica cu democracia como base di principio ta wordo mas respeta si tene na consideracion e escandalonan politico cu e sistema democratico di Aruba mester a guli di personanan cu el a apunta como politico.
Kico ta nifica pa Aruba, cu atrobe Husticia ta expresa su mes contra e comportacion di un Ministro y ta condena e persona cu a goberna na Nomber di Pueblo? Kico ta nifica pa Aruba, cu Benny Sevinger ta Miembro di Parlamento di Aruba pasobra Husticia a dicidi cu ta permiti su persona bandona prizon como acusado, te proximo aviso?
Kico ta nifica pa Aruba, cu mientrastanto otro investigacionnan den cual politiconan ta central, mientras ayera Corte di Husticia a declara Paul Croes culpabel di delitonan comete durante e tempo cu e tabata Ministro?
Realidad ta, cu e serie di caso den cual tin politico envolvi for di inicio di Siglo 21, ta mishi cu e credibilidad di mundo pa calidad di politica na Aruba, cu a lucha pa su Status Aparte pa asina confirma dignidad di Pueblo di Aruba.
Pa sostene nos teoria cu democracia no ta permiti e ofensanan pa cual atrobe un gobernante ta wordo castiga, nos mester presenta e nomber cu mundo ta uza pa paisnan caminda corupcion gubernamental ta bira “serial killer” di democracia.
Republica di Banana ta nomber cu cual mundo ta dirigi su mes na gobernacionnan cu ta ridiculisa democracia y caminda corupcion no ta motibo pa berguensa.
Republica di Banana ta completamente contra e pensamento di e Pueblo di Aruba, reconoci pa Arubianismo cu no ta acepta ni pa un tata dal un betro den cara di su yiu.
E nivel di moral Arubano ta asina halto, cu mester papia di un abuso di confiansa di politiconan cu Huez ta condena pa falta di moral Arubano, cu ta implica cu nan ta abusa y trapa riba e concepto democratico.
Segun democracia imagen di un gobernante ta e cara di Pueblo pasobra e gobernante den e sistema democratico ta wordo eligi dor di Pueblo.
Con por troce e alma di democracia a bira conoci na Aruba, cu na 2021 mester a acepta pa un preso ta riba lista di candidato di partido AVP y pa un preso a wordo eligi den Parlamento despues di un campaña den cual e partido a mobilisa pa hende vota pa un candidato acusa di corupcion.
Den e caso di Benny Sevinger, e abogado mes a trece dilanti cu tin motibo pa un caso pero cu na su parecer, Benny a bira victima di hende cu el a confia.
E investigacion di Husticia den e caso di Benny Sevinger pues a wordo hustifica door di e abogado realmente.
Ayera Corte di Husticia a confirma e posicion di Corte den Prome Instancia y condena Paul Croes, ex colega di Benny Sevinger.
No ta prome bez cu Ministronan di e partido ta wordo sentencia den Corte di Husticia.
Conclusion di e analisis: mester acepta esaki como Gobierno di Pueblo segun normanan democratico?
Personanan condena na Huez mester wordo considera e cara di Aruba? Kico esaki ta implica? Kico e ta nifica pa e partido cu a ataca Husticia ora su hendenan wordo persigui?
Ta pa medio di partido, eleccion di Representantenan di Pueblo y finalmente gobernantenan ta tuma luga.
Partidonan politico tin un deber enfrente Aruba pa e moral cu cual e pais ta wordo goberna.
“Republica di Banana”. Un palabra cu mundo ta uza pa condena corupcion den gobierno, cu segun democracia, ta imagen di e pais, cara di un Pueblo.
Berguensa ta cubri e Arubiano, cu un moral Arubano ehemplar, cu awe ta bira victima di abuso di democracia!
