Pastoor Garcia contento di ta yuda scolnan organiza Caminda di Cruz Bibo

ORANJESTAD (AAN): Diabierna mainta, e alumnonan di Colegio Bon Bini na Madiki a sinti di cerca, con e proceso di Caminda di Cruz Bibo ta tuma lugar, y varios di nan a bisti costuum pa asina participa activamente den diferente sketch di e storianan di Bijbel.

   Tur esaki cu apoyo di nan cabezante Sherissa Tsu, docentenan, y cu sosten di Instituto Kateketico Diosesano Aruba (IKDA), bao guia di Pastoor Wuilder Garcia.

   Den un entrevista, Pastoor Wuilder Garcia a bisa cu nan di Instituto Kateketico Diosesano ta contento cu nan no ta djis trece nan mensahe den parokianan, pero ta acudi na scolnan pa asina trece e mensahe di Dios.

   E ta pa e muchanan di scol compronde tambe cu e cruz di Hesus no tabata facil y cu berdad den bida di nos mes, nos tin nos propio cruznan y cada oracion cu tin un balor importante dilanti Todopoderoso, y Dios mes ta atende nos na e suplicanan ey ora cu bo tin un tiki di sacrificio.

   Scolnan ta haciendo un bon trabao di trece e mensahe di evangelio, y nan como Instituto IKDA mes tin como 3 aña caba drentando den scolnan, specialmente esnan cu tin menos bishita di parokia.

   E biaha aki den 2023, nan meta ta pa bishita cuatro scol na Aruba pa trece e mensahenan aki na un forma diferente na e alumnonan.  Ya caba nan a bishita St. Tarcisius Kleuterschool na Brazil, tambe Colegio San Hose na Santa Cruz, y awor a caba di bishita Colegio Bon Bini na Madiki.

   Cu poder di Dios lo por bay atrobe y aki 2 siman lo bay atende na Colegio Santa Filomena MAVO.

   Na opinion di Pastoor Wuilder Garcia, e bishitanan aki ta un chens pa mustra e alumnonan, cu cada gesto di oracion y sacrificio cerca nos muchanan ta hopi balioso, no solamente pa fe, sino pa mira y experimenta cu Dios den nan bida.

   Den su mensahe pa Aruba, Pastoor a corda tur hende cu Cuaresma ta temporada di ayuno, di oracion, y di misericordia, un temporada pa haci mas di Hesus su misericordia.