Diego de Cuba, Presidente di STA:
ORANJESTAD (AAN) – “Elimina Serlimar no ta cumbini Pais Aruba, pasobra con cu para keda, Gobierno di Aruba ta esun responsable pa e limpieza di e pais den su totalidad”, ta palabranan di Presidente di Sindicato STA, Diego de Cuba.
Diego de Cuba a splica cu si gobierno ta bay subcontrata tercer companianan, aki poco tempo nan ta cobra e ciudadano 200 florin pa recoge e sushinan, y bo tin cu pagu'e.
“Esey ta e cosnan cu nos ta bisa cu mester ta cauteloso y nos a papia varios biaha cu e Minister riba e asuntonan aki, y e ta bisa cu nos mester warda Serlimar sali prome for di surseance van betaling, pero nos ta sinti cu ora e compania sali di esaki e ta morto, cu e maneho cu ta wordo hiba aworaki, y akinan tambe mester bin cambio”, De Cuba a subraya.
“Tambe den e carta cu a bay pa Gerencia di Serlimar vooral, nos kier sa con a para cu tur e bevordering y tur e periodiek cu tin pendiente di e trahadornan, tambe nos mester atende cu personanan cu a wordo retira for di trabao, cu den nos concepto ta inhusto cu nan a haci esey, anto banda di esey hinca hende den posicionnan halto cu salarionan descabeya, Con esaki por ta posible? E board a tuma e decision aki? Minister ta na haltura cu esaki a wordo haci? Tur e cosnan aki ta trece un confusion innecesario y desfavorable pa e compania di Serlimar”.
STA ta para tras di Serlimar su derecho di existencia cien porciento, y pa ningun mama y tata di famia, perde nan trabao pa motibo cu e situacion aki ta tumando lugar.
De Cuba a agrega cu pa e motibonan aki, e carta cu a bay pa Minister y pa Gerencia di Serlimar, STA kier un aclaracion pasobra e trahadornan ta cla pa bay den accion. “Si nos no haya un aclaracion riba e cosnan aki e ta bay desemboca den un accion bastante formal. Pasobra ami no por pensa riba un siman cu Serlimar no ta pasa recoge sushi”, De Cuba a subraya.
Diego de Cuba a señala cu ta secreto publico cu hopi hende ta pasa benta sushi na tur caminda, y e hendenan cu ta haci limpieza den cura di hende, ta hendenan humilde. “Si antes nan tabata cobra 50 florin pa un truck di sushi pa tira afo, aworaki nan yega pariba aya, nan ta dal cu 125 of 150 florin, e no ta bay…E comunidad tin cu paga pa esaki?” Diego de Cuba a cuestiona.
