Hasta Voodoo ta wordo uza pa e situacion di desesperacion na e pais - *Organisacionnan mundial ta trata na cambia suerte di hopi Haitiano - *Region di Caribe ta keda preocupa pa insiguridad cu situacion ta crea
ORANJESTAD(AAN)—Kico ta pasa cu Haiti? Un pregunta cu mundo ta haci su mes pa hopi tempo. Varios motibo sin documentacion valido a wordo uza pa haya un splicacion pa e situacion na Haiti, uno di e paisnan mas pober di America.
Mientras henter mundo a cuminsa beneficia di e temporada despues di Segundo Guera Mundial, Golden Age, Haiti a keda den un situacion deplorabel.
Tempo di regimen Duvalier mundo a papia di dictadura. Ora a baha Baby Doc Duvalier, e problema no a yega na un fin. Gobiernonan nobo a tuma poder na e pais.
Den e temporada despues di dictadura Duvalier y regreso di expresion di palabra, mundo por a cera conoci cu argumentonan di sindicalista y politiconan cu ta voodoo ta causante di e problemanan na Haiti.
“Haiti, pais de la magique?” tabata un obra naci den mundo sindical cu a sostene e base cu e prome gobernantenan cu a yama nan mes democratico despues di Duvalier, a mantene.
Nan punto di salida ta cu ta voodoo ta stroba Haiti di conoce progreso.
Mientrastanto mundo liber a sigui busca forma pa yuda e pais caminda organisacionnan internacional mester percura pa asuntonan basico manera awa pa e pais.
Organisacionnan mundial ta yuda preveni malesanan cu otro paisnan na mundo pa basta tempo tin bou control.
Den esaki tambe e pensamento di voodoo a hunga un papel importante ya cu segun politiconan di e pais, traha riba un infrastructura aceptabel di cuido medico tabata wordo obstaculisa dor di e culto di magia.
Ayera Haiti atrobe tabata den estado di emergencia nacional despues cu su presidente a wordo asesina. Mundo a cuminsa reacciona riba morto di e ultimo dirigente cu mester a baha na Februari 2021 pero a dicidi di keda un rato mas manera ta socede cu politiconan na e pais, cu ta biba cu miseria grandi.
E problemanan social di Haiti ta motibo di preocupacion grandi den e region cu ta considera Haiti cuna di regimennan cu por bira peligroso pa henter e region Caribense pero tambe centro di problemanan social cu ta causante di un migracion enorme pa otro pais.
E temor mas grandi ta, cu e fayo di maneho politico cu ta elimina e sentido di democracia cerca pueblo, ta habri caminda pa politiconan peligroso cu por introduci sistemanan peligroso na e pais.
Informacionnan internacional cu DIARIO ta ricibi di fuentenan special cu cual e tin contacto riba diferente tereno, ta indica cu e intrankilidad na e pais por sigui plama sigur pa Republica Dominicano cu a cera su fronteranan cu e pais.
Pero temor ta existi cu e condicionnan nobo lo haci cu mas miembro di comunidad di Haiti lo bira refugiado social na otro paisnan den region di Caribe, cu ayera tabata contempla intrankilidad enorme na e pais, caminda un presidente cu atrobe no a cambia condicionnan di bida di e Haitianonan, a wordo asesina.
