Pasion pa bolero cu Robert “Ro” Agunbero

ORANJESTAD (AAN) - Robert Agunbero artista local di bolero ta bay back den tempo pa trece e mihor bolero nan clasico cu un toque di color di Ro pa nan no bay den olvido.

Como mucha ja caba Ro tawata bezig cu musica, na Alameda den Emanstraat tocando riba bleki nan bashi di lechi. No tabata stroba ningun hende y tabata train cu curazon yen cu instrumento nan improvisa.

Cu un edad hoben, Ro a forma parti di ” Los Principes” como cantante all around hunto cu Joy Kock, Lucio Rivadeneira (DFM), Herman Stevens y demas. Despues Ro a join ” Nueva sensacion” den aña nan 60 y principio di 70 cu Mario Bislick (DFM).

Na aña 1963 pa motibo nan di trabao tabata impedi pa Ro Agunbero keda activamente den e constelacion musical. Asina a keda te na aña 1999 cu Ro a bin cu un idea pa saca un CD cu den e tempo ey tabata na moda y a logra esaki. Asina e prome CD titula “Aquella epoca Boleros clasicos volumen 1” a sali cu bastante exito.

Di 2 CD titula “Boleros Clasicos volumen 2”a sali na November 2003 net prome cu temporada di pasco. Un di 3 Produccion titula “Canciones nostalgicas” a ser lansa na 2008. Na aña 2011 Ro a lansa un di 4 producion titula “Mi vieja Rocola”.

Na Cuba Ro a jega di canta cu sexteto “San Miguel” unda e dea a nace pa graba un produccion riba CD. Ro a canta den “Aloe di oro” na Surf side organisa pa Carmelo Heyer (DFM). Tambe Ro a canta den Tropicana Show Room na Royal Cabana Casino durante anja nan 2000 - 2005 cu entre otro cantante nan manera Fernando Alvarez di Cuba, Dennis Cecilia di Corsow, Feloria Marquez di Venezuela y tambe Gilberto Santa Rosa.

Tambe Ro a presenta den diferente ocasion den Cas di Cultura durante “Nochi di Boleros” organisa pa Efrain Antonio. Tambe por conta cu presentacion nan den Bali Bar na Aruba Caribbean Hotel, como tambe na Club Caribe hunto cu Felipe Pirela(DFM) di Maracaibo, Venezuela.

E produccion nan a ser manda pa mas cu 110 radio emisora den henter latino america, cu en particular e prome radio emisora na Latino America cu a ricibi un copia tawata Radio emisora “La Voz de la fe” di Maracaibo Venezuela pa DJ Celso Atencio.

Ro y famia kier gradici tur persona cu a yuda directamente y indirectamente cu e produccion nan.

Muy en especial un gradicimento ta bay pa Joy Kock, Lucio Rivadeneira (DFM), Franklyn Granadillo, Papito Rafael, Robert Jeand’or, Etty Toppenberg, Johnny Scharbaay, van Quandus, Pedro Velasquez, Pepe Gonsalez (DFM), Robby Hart, Ebby Peterson, Carl Tjong-a-Tjoe, Celso Atencio na Maracabo, Armando Bulos.