ORANJESTAD (AAN) – Den conferencia di prensa di Gobierno, Diaranzon di e siman aki, Edwin Jacobs, director di Banco di Seguro Social (SVb), a duna un actualizacion di e desaroyo di e fondonan di SVb.
Jacobs a splica cu SVb a constata, pa tres luna sigui, cu e tendencia cu a surgi desde April aña pasa, despues cu e pandemia a drenta Aruba, unda e cantidad di trahadornan registra na SVb tabata reduci tur luna, yegando na Februari 2021 e reduccion a merma y ya pa 10 di Maart e tendencia aki a reverti cu un crecemento di trahadornan asegura na SVb, mescos cu e cantidad di relacionnan di trabao.
El a duna di conoce cu di 1 di Maart te 31 di Mei, SVb ta mira un aumento di 1.5% di e cantidad di trahadornan registra: 587 trahado y 803 relacion di trabao nobo cu a wordo registra na SVb, cu ta duna un indicacion di 2.1%.
E proyeccion conservativo di SVb pa e resto di e aña aki, ta cu e mercado laboral lo crece cu 3.300 trahado, representando un 8.6%. Pero esaki ta “conservativamente”, Jacobs a reitera. “Nos lo ta yegando e ora ey na 41.600 pa casi 41.700 trahador registra na SVb”, Jacobs a idica.
Kico e desaroyo aki lo bay nifica pa e fondonan di SVb?
“Aña pasa, SVb a base di e proyeccionnan cu tabata tin na e momento ey, a scoge pa haci su presupuesto basa riba un escenario pesimo, y na e momento ey e deficit proyecta pa e fondo tabata di 90.7 miyon florin, lo cual nifica cu dede luna di October SVb lo tin mester a bati na porta pa sosten di likidez, pasobra SVb no tabata tin bastante likidez.
“ A base di e desaroyonan aki nos a constata expectativanan economico cu tin y a haci un calculacion nobo y Diamars esaki a keda presenta na CAft, unda cu e deficit proyecta aworaki ta na 39.5 miyon florin, locual ta nifica cu SVb e reservanan suficiente pa cubri e deficit aki, por lo tanto, e aña nos no ta premira cu mester bati na porta di gobierno, pa ayudo di likidez. Aworaki nos ta premira cu SVB lo cera e aña aki cu 26 miyon florin den caha pa 2022. Si e desaroyo di trahadornan asegura ta aumenta mas cu loke nos a proyecta, naturalmente e deficit aki ta bay baha.
Manera mi a caba di bisa, nos ta saliendo aki for di un proyeccion conservative, pero tin hopi chens cu e lo bira mas cu esey”, director di SVb a relata.
