ORANJESTAD (AAN): Diahuebs mainta AZV a convoca un conferencia di prensa, unda relacionista publico Solange Tchong a duna un update pa loke ta e situacion di docternan di cas.
El a splica cu dentro di poco algun docter di cas ta bay stop di traha cu AZV y door di esaki AZV tin cu percura pa e traspaso automatico di e pashentnan di e docternan, pa percura pa nan sigui haya nan cuido medico.
Tchong den nomber di AZV a gradici dokter Pieterse-Clements Marjorie y docter Pieterse Huub pa e servicio cu nan a brinda na e pashentnan.
AZV ta manda un mensahe dirigi na tur asegurado inscribi na dokter Pieterse Huub y Pieterse-Clements Marjorie. Tambe pa tur asegurado inscribi cerca dokter Orlay Gonzalez Diaz.
Pa percura cu e aseguradonan por sigui ricibi cuido medico, AZV a haci un traspaso automatico.
E siguiente dos lunanan, tur pashent di dokter Pieterse-Clements, Marjorie ta haya servicio medico via e oficina di dokter di cas Aury Wever. Aki ta unda den e luna di augustus y september lo tin un dokter di cas pa brinda servicio na e grupo di pashentnan cu tabata inscribi cerca dokter Pieterse-Clements, Marjorie. Pues ta haci uzo di e localidad di dokter Aury Wever na Caya Ernesto Petronia 74 pero e dokter di cas lo tin su propio oficina eynan. E number di telefon ta 585-7521 y linea urgente ta 562-8186.
E siguiente dos lunanan tur pashent di dokter Pieterse, Huub ta haya servicio medico via e oficina di dokter di cas Priscella Tjon-Kon-Sang na Katoenstraat 11. E 1e siman di augustus dokter di cas P. Tjon-Kon-Sang y dokter B. Britt-Croes lo brinda servicio. Dia 9 di augustus un dokter di cas lo yega for di Hulanda. Akinan tambe ta conta cu e dokter di cas tin su mes oficina den e localidad. Number di telefon 566-0266 y linea urgente ta 566-0260.
Despues di e dos lunanan aki, esta entrante 1 di October e HOED lo start (Docternan di cas bou di un Dak). Mas informacion tocante e localidad exacto di esaki lo worde duna ora tur cos ta cla.
Tambe Organo Ehecutivo AZV ta informa tur pashent inscribi cerca dokter di cas Orlay Gonzalez Diaz:
Docter Orlay Gonzalez Diaz tambe ta stop di traha cu AZV. Su pashentnan a worde traspasa automaticamente pa e dokter di cas Dennis Rasmijn, kende lo keda brinda servicio for di e practica ubica na Bubali 72F. E dokter di cas Dennis Rasmijn ta un dokter Arubiano di 34 aña di edad.
Su trayectoria escolar el a pasa na Aruba y despues el a bay studia medicina general na Rijksuniversiteit Groningen. El a obtene su bachelor’s y su Master’s y despues a dicidi di regresa Aruba. Aki dokter Dennis Rasmijn su pasion a crece mas ainda y el a scog’e pa haci e Huisartsopleiding na Aruba mes. Dokter Rasmijn tin bon dominio di Papiamento, Hulandes, Ingles y Spaño.
Como Organo Ehecutivo AZV ta gradici e docternan di cas saliente y ta yama e docternan di cas nobo bon bini.
