Ta evidente cu diferente guera ta wordo conduci den compania di Pueblo - *DIARIO no ta subi veld pa schop bala den un situacion lamentabel - *Parlamento mester investiga posibel spirito berde, na cabez y na pia di WEB
ORANJESTAD (AAN) — Ta increibel kico por pasa na un pais democratico, caminda Pueblo ta hiba un lucha pisa den un pandemia.
Atrobe casonan fatal di Covid-19 ta exigi tur atencion. Trahadonan di Aruba mester bolbe trabou y negoshinan mester habri nan porta den un incertidumbre mundial provoca pa Covid-19.
Ta sumamente tristo cu ta hustamente na momento cu Aruba mester ta uno pa enfrenta un futuro carga di reto y responsabilidad, cu na un compania di Pueblo di Aruba, un compania vital den e bienestar di Aruba y tambe recuperacion di e pais, desaroyonan inaceptabel ta saca cabez.
Aparentemente tin exponentenan di diferente causa personal of di nan grupo directo, cu ta kere cu si nan schop e bala den direccion di DIARIO, wega por cuminsa pa asina kita atencion di Pueblo di Aruba for di un situacion cu for di 2012, pues no 2021, Aruba mester a duna tur atencion.
DIARIO no ta wordo manipula pa ningun hende, ni grandi ni chikito, ni loke ta kere cu e ta inteligencia di mundo, ni loke ta kere cu e por haci y deshaci cu Aruba manera e kier.
DIARIO no ta na haltura di wega cu ta wordo hunga cu bienestar di un Pueblo y DIARIO ta dicidi kende e ta considera kende e ta considera di ta coresponde na e exigencianan, pa subi veld hunto cu DIARIO.
Un cos si mester adverti tur cu ta sigui schop bala contra palo di goal.
Un analisis ta wordo haci awe di e componentenan den un wega cu bienestar di Pueblo di Aruba, cu mester termina.
Wega politico cu ta wordo hunga, pasobra den e desaroyonan entorno WEB, a conoce presentacionnan ridiculo di partido AVP, cu entre otro un Marlon Sneek y un Arthur Dowers cu a baha e prestigio cu cual un Miembro di Parlamento mester a atende loke ta pasa na Aruba.
Mester averigua si tin interes, hasta e interes pa no perde cara, cu e carta cu WEB, Hoevertsz(Utilities) y Gas Unie a manda pa Mike de Meza.
Awe tin interes di un grupo di trahado cu no kier aporta na fondonan social den pandemia na Aruba.
DIARIO a demostra cu e no ta bay schop bala riba veld cu un Marlon Sneek, cu a hinca un auto goal ora el a papia di Gas Unie di Hulanda, cu hunto cu WEB y Hoevertsz e tempo na mando di Utilities, kier a yega na un areglo cu Mike de Mezas na 2017 pa “companianan” cu te ainda ta spirito, bin maneha e planta di awa y coriente asina esencial pa e Arubiano y pa Aruba.
DIARIO no ta bay schop bala cu miembronan di un gerencia, cu na prome hora a pone DIARIO rectifica cu nan ta negocia cu Eagle LNG, comosifuera cu ta susha nan ta susha nan mes si nan ta sinta den compania di e compania prestigioso Mericano cu no ta sinta riba banki pa busca bala riba veld manera Nicolas Maduro cu si tabata bon bini cu su pipa di gas.
No a tarda pa e mes miembronan di gerencia aki, cu a kere cu nan por pone DIARIO na careda, a cambia di opinion pa nan declara cu nan no por bay contra e Gobierno cu Pueblo di Aruba a pone na mando y a declara cu nan a stop tur otro negociacion pa negocia cu Eagle LNG.
Ora analisa esaki, kico mester ta e conclusion sigur si awor tur negociacion a tranca?
E conclusion di DIARIO, cu no ta amateur ni tin costumber di hunga bala cu amateur, ta, cu Parlamento mester haci su trabou.
Produccion di awa y coriente ta vital pa Pueblo di Aruba y awe mester habri un Encuesta Parlamentario pa investiga tur compania cu lo a subi veld pa trece gas pa Aruba for di 2012. Pa investiga e suma di 200 Miyon cu cual Gabinete Eman kier a participa den un aventura cu Valero cu tabata na porta di salida.
Mester bini un Encuesta Parlamento pa trece claridad cu democracia ta exigi pa Aruba haya tur informacion kende tabata candidato pa trece gas; pakico no tin prueba kende a wordo haya pa trece gas na 2017 manera documentonan ta bisa; y pakico te awe WEB no por yega na un areglo cu Eagle of entrega na Gobierno of Parlamento un rapport cu Eagle ta contra bienestar di Aruba.
DIARIO no ta subi veld pa schop bala, pero ta sinta na su haltura pa demanda loke leynan di Aruba ta exigi pa pasa na Aruba!
