ORANJESTAD (AAN): Hopi hende sa haci e pregunta, si acaso comemento di webo lo por afecta bo riñonnan.
Den e articulo aki, DIARIO ta trece dilanti loke expertonan ta bisa, y encuanto un investigacion nobo. Hecho ta cu pa algun persona, webo por ta un ayudo nutricional grandi, pero e por tin potencial riesgo tambe.
Pa hopi tempo, en general webo tabatin un mal reputacion pa su contenido di colesterol, y cu estudionan di pasado a yega di conecta webo fuertemente cu malesanan di curazon. Sinembargo investigacionnan mas recien, a demostra cu e relacion entre colesterol den bo cuminda, y colesterol den sanger ta hopi debil. Ademas, e investigacionnan a indica cu webo por ta di berdad un parti saludabel di alimentacion.
Webo ta un alimento cu ta sirbi como fuente grandi di proteina di calidad halto, ta contene 9 aminoacido esencial. Webo tambe tin hopi vitamina y mineral, incluyendo Vitaminanan A, D, E K, folato, selenio, y Vitaminanan di grupo B, y colina, cu ta un tipo di vet cu ta clave pa e funcionamento corecto di e celnan den bo curpa.
Pero no obstante tur e beneficionan aki, webo ta un bon fuente di proteina di animal y fosfor, cu por pone ta necesario pa limita esey ora di sirbi cuminda pa hendenan cu ta sufriendo di Malesa Cronico di Riñon (Chronische Nier Ziekte, conoci como CNZ). Pesey e recomendacion pa e tipo di pashent aki ta pa nan consulta cu un nutricionista pa sa cuanto webo nan por come sin riesgo.
Na Merca mes, e National Kidney Foundation ta recomenda hopi pashent cu CNZ pa evita of reduci significantemente consumo di dor di webo, specialmente si bo nivelnan di fosfor den sanger ta hopi halto. Ta preferibel limita bo mes pa come e blanco di webo, cu ta aporta cu proteina sin e exceso mineral asocia cu ne.
Impacto di webo: Aki por lesa loke ta e impacto di webo cerca esnan cu tin malesa di riñon. Esaki ta algun di e recomendacionnan di National Kidney Foundation riba e consumo di webo cerca pashentnan cu problema di riñon.
Pa CNZ of Transplante: Webo ta un bon fuente di proteina di animal y fosfor, cu ta pone necesario limita e consumo si bo tin CNZ. Pero puntra bo nutricionista of docter prome, pa sa cuanto webo bo por come sin riesgo.
Webo ta hopi abao den sodium y potassium, y esey lo por ta util. Si bo ta come webo curu of cu e dor liquido, bo ta core riesgo di haya un malesa di origen di cuminda. Pesey ta recomenda semper come webo cu dor cushina, principalmente si e pashent a haci un transplante di riñon.
Hemodialisis tres biaha pa siman: Bo curpa mester di proteina adicional si bo ta ricibi dialisis. Pasobra webo por ta un gran fuente di proteina di calidad halto. Pero nan ta contene algo di fosfor. Pashentnan di dialisis tin di puntra un nutricionista con nan por inclui webo den nan cuminda na un forma sigur.
Hemodialisis tur dia: Si abo como pashent ta ricibiendo dialisis tur dia, of dialisis nocturno, esaki nifica cu bo mester di aun mas proteina. Webo por ta un gran fuente di proteina di calidad halto, pero nan tin tiki fosfor aden. Atrobe aki abo tambe tin di check un nutricionista pa sa cuanto webo ta safe pa bo come.
Piedra den Riñon: E pregunta di algun hende tin biaha ta bin dilanti, si comemento di webo ta castigabo despues cu piedra den riñon (kalksteen). Pero a keda demostra, cu comemento di webo no tin ningun efecto cu ta pone kalksteen forma den bo Riñon.
Personanan cu a yega di haya piedra den Riñon, tin di siña riba e importancia pa limita comemento di cierto cuminda, specialmente esnan cu ta halto den oxalate y sodium, y pa ta cauteloso cu comemento di hopi proteina di animal. Specialmente cuminda manera spinashi, e berdura rhubarb (conoci na Hulandes como Rabarber), chuculati, noot, y algun berry ta hopi halto den oxalate y bo tin di come nan na forma modera. Ademas evita di come sodium cu ta bin den cuminda procesa of fast food tambe ta importante. Y e secreto tambe ta pa bebe hopi liquido pa dia, pasobra e ta evita piedra di Riñon door cu e ta verdun e urina y reduci e concentracion di mineralnan cu por pega na otro y forma kalksteen. Un hende homber mester bebe 3.7 liter di liquido pa dia. Un hende femenino tin di bebe 2.7 liter di liquido pa dia. Pero evita cu esaki ta liquido cu demasiado sucu, pasobra esey tambe ta yuda formamento di kalksteen.
Si bo tin un curpa tiki yen, tin hende cu ta hasta bebe mas awa pa dia. Y asina cu bo haya sed, corda bebe mesora. Esey ta un señal cu bo curpa ta dunabo cu e mester di liquido.
