Un gran honor pa e isla
ORANJESTAD (AAN): E servicio di haci reservacion cu aerolinea, hotel, y auto, esta e mundialmente famoso Expedia, a caba di divulga nan rapport cu ta ser yama “Expedia’s 2025 Island Hot List”. Y riba e lista, e top destinacionnan ta Aruba, Bali, y Republica Dominicana.
E lista aki ta un guia pa e islanan mas popular, y esaki ta basa riba esnan cu ta book pasashi y hotel recientemente, y tambe trend di buskeda riba internet.
Aruba a haya e titulo di mihor isla pa ‘Year-Round Sunshine’, y Expedia a raporta cu tin un subida di 15% den interes di viahe, compara cu aَña pasa pues 2024. Nan ta yama vakantie na Aruba como “Desert Beauty Meets Caribbean Bliss”. Segun Expedia, e paisahe di Aruba ta seco y cu solo constant, y esey ta haci esaki un destinacion popular pa esnan cu ta bay cana, core bicicleta, of djis relaha na beach.
E isla di Bali a haya rango di ‘Best for Relaxation’, y ta atrae turistanan cu ta eco-conciente cu ta busca hospitalidad di zero-waste, bienestar, y conexion cultural. Pues escapenan conciente y spiertamentonan spiritual den un ambiente exuberante y trankilo.
Republica Dominicana a sali na di tres lugar riba e lista di Expedia, y a ser describi como ‘Best for Adventure’. Segun Expedia, interes pa viaha pa Republica Dominicana ta keda subi 10% cada aña, y awor turistanan ta cuminza check mucho mas cu e Resortnan All-Inclusive cu e pais di merengue ta conoci p’e. Nan ta cuminza book mas excursionnan manera bishita waterval, core mountain bike, snorkel, y tambe zipline. E pais a cuminza haya mas cancha di golf cu ranking na halto, ofreciendo bista fenomenal di oceano ora cu bo ta hungando e 18 holnan.
E otro destinacionnan internacional cu a logra yega riba e Hot List di Expedia ta inclui Fiji, Jamaica, Koh Samui (Thailandia), Maldives, Paros (Grecia), y Sardinia (Italia).
Expedia a raporta cu e interes global pa vakantie na un isla a subi tur caminda, y ta na un promedio di 30% compara cu 2024, y e factornan pa esaki ta cu tin mihor conexion di vuelo, y un opcion mas amplio di atraccion cultural, natural, y recreacional.
E rapport aki a wordo traha via reaccion di viaheronan, consehonan di viahe, y data di buskeda for di e website di Expedia.com y hopi hende ta enfoca riba vakantie cu nan por paga, acceso (si tin suficiente hotel), e tempo, y seguridad di viaheronan.
Segun Expedia, e mihor luna pa viaha y bishita un isla ta September. Pasobra aki ta haya un mezcla di prijs mas atractivo y mihor tempo. Bo por spaar tambe durante off-season, y algun turista den off-season ta spaar hasta te cu 50% compara cu prijsnan promedio.
