Linguista Ramon Todd Dandare:
ORANJESTAD (AAN): Diasabra 9 di augustus ta conmemora Dia Internacional di e Pueblonan Indigena y den cuadro di esaki na Biblioteca Nacional Aruba tabatin un charla hopi interesante organisa pa Fundacion Lanta Papiamento y Fundacion Rancho.
E charla: Lenga Indigena – Tradicion y Supervivencia a conta cu un orador special y esaki tabata Ramon Todd Dandare Mag. Ling.
Un sala completamente yen y un publico entusiasta por a haya informacion hopi interesante y na mesun momento por a comparti datonan y experiencianan relaciona cu e tema.
TEMA DI UNESCO 2025: E pueblonan indigena y inteligencia artificial defendiendo nan derechonan cu bista riba futuro
Un di e temanan cu Todd Dandare a trata ta cu inteligencia artificial ta cambiando mundo rapidamente. Pa e pueblonan indigena esaki ta representa tanto un oportunidad como un riesgo.
Aunke Inteligencia Artificial por duna apoyo na revitalisacion cultural, empoderamento di hubentud y hasta adaptacion na cambio climatico, hopi biaha e ta reforsa prehuicio, exclusion y distorsion relaciona cu e comunidadnan indigena.
Ta desaroya mayoria di modelo di Inteligencia Artificial sin participacion indigena, loke ta trece cu ne e riesgo di un uzo incorecto di nan datonan, conocemento y identidad. Ademas, creacion di centro di dato masivo den nan entorno tambe por afecta nan teranan, e recursonan natural y e ecosistemanan indigena.
Ta trata di un problema nobo cu ta bin acerca riba e barera ya existente di acceso na tecnologia nobo, specialmente den e zonanan rural, loke ta reduci nan participacion den e procesonan relaciona cu IA. Pa libera tur e potencial di IA, mester reconoce e pueblonan indigena como pueblo cu tin derecho, cu tambe ta crea y cu ta tuma decision.
Inclusion significativo, soberania riba nan datonan y innovacion cu base cultural ta clave pa garantisa cu lA lo empodera nan comunidadnan, sin laga niun hende atras, Ramon Todd Dandare a remarca.
{gallery}Mester reconoce e pueblonan indigena como pueblo cu tin derecho, cu tambe ta crea y cu ta tuma decision{/gallery}
