"Educacion ta un regalo cu ningun hende por kita for di bo"
ORANJESTAD (AAN): Paseo Herencia ta orguyoso di anuncia un donacion di AWG 5,000 pa apoya e iniciativa di Gobierno, ‘Common Good’, un programa orienta pa fortalece e bienestar comun di nos sociedad. E iniciativa aki ta basa riba e vision cu un comunidad fuerte ta wordo construi hunto dor di inverti den valor, pasion y e desaroyo integral di nos pueblo.
Sosten na e comunidad y e empoderamento di nos hubentud semper tabata parti fundamental di e balornan di Paseo Herencia. Como parti di su programa di añanan largo, Gift of Education, estableci na 2015, Paseo Herencia a inverti continuamente den e hobennan di Aruba, creyendo firmemente cu educacion ta e base primordial pa guia e hobennan pa un futuro exitoso. Paseo Herencia a scohe pa apoya e proyecto Back to School di Fundacion Pa Nos Comunidad, cu ta alivia e carga financiero pa e studiantenan y nan famianan. Esaki ta un paso cu ta conecta perfectamente cu nos vision.
"Educacion ta un regalo cu ningun hende por kita for di bo," gerente di Paseo Herencia a expresa. "Desde 2015, nos meta semper tabata pa elimina e bareranan financiero pa asina cada studiante tin e hermentnan pa sigui studia. Door di contribui na e programa 'Common Good', nos ta sinti nos mes honra di por contribui na studiantenan cu mester di apoyo.
Un Mision Mas Amplio: Empodera e Hubentud di Aruba
E contribucion na e programa ‘Back to School’ ta resalta e mision general di Paseo Herencia pa eleva e comunidad local pa medio di cuater programa:
- Gift of Education: Ayudo financiero pa studiantenan dedica cu tin limitacion economico.
- Gift of Sports: Apoyo na desaroyo atletico di hubentud y un estilo di bida saludabel.
- Gift of Sports (USA Edition): Extension di oportunidadnan deportivo riba un nivel internacional.
- Gift of Arts: Un iniciativa nobo diseña pa stimula talento creativo y expresion artistico.
Tras di e esfuersonan combina aki y e colaboracion continuo cu e comunidad, Paseo Herencia lo sigui ta un apoyo firme pa e lidernan, inovadornan y creadornan di mañan.
