Elmar y Scol Teatro Aruba TRIBI ta colabora pa trece e poppenkast show bek pa muchanan

ORANJESTAD (AAN): E compania NV Elmar cu su “Electra Discovery Tour 2026” a sigui su

ruta cu su di cuater stop na Centro di Famia Piedra Plat. Durante e bishita, e muchanan a disfruta di un Poppenkast show educativo di Chispito, presenta den colaboracion cu Scol Teatro Aruba TRIBI bou di e tema “Switch On Safety”.

   Cu e colaboracion aki, Elmar y Scol Teatro Aruba TRIBI kier contribui na e promocion di poppenkast como un forma creativo di educacion y entretenimento pa muchanan. Poppenkast tabata un actividad bastante popular den pasado, y mediante Electra Discovery Tour, e dos organizacionnan kier duna muchanan di awe e oportunidad pa experiencia e forma special aki di conta storia y siña.

   E Poppenkast show di Chispito ta combina humor, interaccion y educacion pa presenta regla importante di siguridad electrico den un forma cu ta facil pa muchanan comprende y recorda. Durante e show, e muchanan ta siña, entre otro, pa keda leu for di liñanan di distribucion di coriente, pa nunca toca stopcontact y pa ranca e kabel di un aparato for di stopcontact na su stekker, y no na e kabel.

   Despues di e show, cada mucha a ricibi e figurin oficial di Chispito. E figurin ta funciona como un herment educativo pa stimula mayor y mucha pa sigui conversa tocante siguridad electrico na cas.

   Electra Discovery Tour ta un iniciativa di NV Elmar den cuadro di su programa di Corporate Social Responsibility. Pa segundo aña consecutivo, e roadshow ta bishita Summer Camps rond di Aruba, cada aña cu un concepto diferente cu ta combina educacion, siguridad y entretenimento.

   E tour 2026 a inicia na Stichting Ambiente Nobo na Santa Cruz, sigui pa YMCA San Nicolas y Alpha Explorers Camp na Paradera. Centro di Famia Piedra Plat ta e di cuater stop di e tour. E siguiente stop di Electra Discovery Tour 2026 lo ta na Connecting Worlds Summer Camp na Oranjestad.

   Mediante e colaboracion cu Scol Teatro Aruba TRIBI, NV Elmar ta no solamente promove siguridad electrico, sino tambe ta contribui na mantencion y promocion di poppenkast como un forma valioso di teatro y educacion pa e generacion nobo.