Kathy Paskel, Director DIMAS:
ORANJESTAD (AAN)-- Director di DIMAS, señora Kathy Paskel, a splica den entrevista cu Matutino DIARIO, cu ta hopi importante solicita un carta di re-entrada si nan ta biahando pa exterior, ta e personanan cu a haci un peticion di prolongacion di permiso y ainda no a haya un contesta riba esaki.
“Pa nan si nos ta haci un recomendacion totalmente, pa haci e aplicacion ey si nan ta biahando pa exterior, of si actualmente nan ta den exterior y kier bin Aruba pronto”, Paskel a menciona.
El a reitera cu e peticion ta online, y pa paga e 40 Florin, si nan ta den exterior actualmente, probablemente nan mester di hende na Aruba.
“Pero ta un carta cu ta informa autoridadnan migratorio cu e persona ey cu ta biahando cu e documento, por bolbe Aruba y no mester visa, pasobra e ta bibando aki na Aruba, caba”, señora Kathy Paskel a acentua y añadi cu esaki ta un tramite cu ta dura un siman tambe.
Paskel a indica cu esaki no ta un tramite nobo, pero e ta existi desde semper, pero durante DIMAS ta recorda esaki mas tanto durante e temporada di vacancy. “Henter aña hende ta biaha, pero den e temporada aki nos kier a haci esaki mas conoci pa tur hende.
Na momento cu DIMAS ta procesa un peticion pa permiso, nan ta haya nan permiso via email, y nan por mustra nan permiso tambe na autoridad si nan ta biahando. Pero nos permisonan ta na Hulandes, y p’esey nos ta recomenda si bo ta bayendo un pais cu ta di otro idioma, of no ta compronde Hulandes, pa pidi, pa siguridad, un carta di re-entrada, pa bo no haya bo cu inconveniente, cu autoridad no ta bay compronde e documento y e ora ey bo ta keda atras”, Director di DIMAS, Kathy Paskel a remarca.
