Director di FADA Rhomyko Winklaar:
ORANJESTAD (AAN) – Den entrevista cu e director di Fundacion Anti Droga Aruba (FADA), señor Rhomyko Winklaar, el a bisa cu e problema di consumo di alcohol ta grandi mundialmente, y Aruba no ta e excepcion.
“Nos sa cu nos pilar economico ta turismo, y turistanan di tur edad ta bin nos pais pa nan goza, pasa pret, disfruta di nan tempo liber, un vacacion, dushi. Via red social por a mira un situacion unda un persona a subi un bus y despues no por a wanta e alcohol mas. Y eynan ta na unda nos muchanan ta wordo expone diariamente”, Winklaar a declara.
El a agrega cu tur hende sa cu alcohol, mundialmente ta genera no miyones, ni billions, pero triyon dollar, euro y florin, caminda cu hopi biaha, nan como fundacionnan, naturalmente, tin cu bringa contra esaki pasobra nan no tin otro fondonan cu locual nan tin.
“Pasando na tur scolnan nos ta ripara cu enberdad muchanan na un edad hopi hoben, cu nos curazon ta echt kibra, ta uza alcohol, pasobra nos como mayor ta wak muchanan cu tambe ta cerca di nos cu ta yega cerca di alcohol, y parti mas tristo ta cu e mesun mayornan ta ofrece nan esaki”, director di FADA a señala.
Esaki ta na unda FADA ta acerca scolnan, pa duna charla na e alumnonan, y nan ta urgi mayornan pa un bez cu nan haya invitacion di scol acudi pa haya informacion.
“Nos ta ripara cu ora e mucha ta chikito cu e ta cuminza su kleuter, su basis onderwijs, mayornan ta bay un ouderavond, pero asina cu e mucha ta bay un MAVO, HAVO, EPB, VWO, nos ta wak cu esaki ta bay disminui. Y na e momento ey ta cu mester tin bo yiunan bao control den sentido cu bo sa cu nan ta bay cuminza sali, ta cuminza experimenta kizas cierto alcohol, of otro substancianan, y eynan ta na unda abo como mayor mester tin un conexion amplio cu bo yiu pa bo sa cu bo yiu tin un pregunta pa hacie cerca bo”, Rhomyko Winklaar a señala y a expresa cu mayornan ta e prome responsablenan di nan yiunan.
