Ministro di Turismo a reuni cu varios instancia relaciona cu ex-edificio di DOW

ORANJESTAD (AAN): Dialuna mainta Minister di Turismo y Salud Publico sr. Dangui Oduber conhuntamente cu

Director di Aruba Ports Authority (APA) sr. Marc Figaroa, CEO di Aruba Tourism Authority (ATA) señora Ronella Croes y tambe e representante di DOW y Monumenten Bureau Aruba, sr. Raul Gei, a bini hunto pa un “kick off meeting” pa e proyecto di ex-DOW cu lo inicia pronto.

   E proyecto pa e edificio di ex-DOW ta un proyecto di renobacion. E edificio aki cu ya caba tin 16 aña bandona, ta un bista menos agradabel pa nos bishitantenan cu ta baha for di crucero.

   Pronto, Aruba lo mira desaroyonan di e proyecto di Port City y esaki tin como plan tambe cu e oficinanan existente di APA (otro banda di Yrausquin & Sons) lo mester muda bay den e edificio renoba di ex-DOW. Como esaki ta un edificio basta grandi ta bay comparti e edificio di manera cu e piso 2 ta bira oficinanan di APA.

   Aruba Tourism Authority (ATA) ta bay huur piso 1 di e edificio y lo bay converti e piso aki den un Visitor Information Center (VIC) pa brinda informacion na nos bishitantenan. E VIC lo brinda tur informacion di kico tur tin di haci na Aruba, kico ta tur e actividadnan, nos miho beachnan, lista di restaurantnan y kico tur nos tin pa ofrece, nightlife, transporte y mucho mas. E lo sirbi como un guia pa e turista asina cu e baha di e barco crusero.

   Minister Dangui Oduber su vision y maneho den turismo ta basa riba keda haci inversionnan continuo den producto Aruba. Aruba ta un bon producto y di calidad. Pero pa mantene nos mes competitivo e ta di vital importancia pa keda haci inversionnan continuo den nos producto y esey ta locual cu ta worde haci tambe cu e proyecto aki.

   Minister Oduber a demostra di tin un vision cla di proyectonan cu lo beneficia nos turismo y nos pais Aruba y renobando e ex-edificio di DOW lo tin un potencial grandi pa nos turismo crucero. Finalmente un danki na APA, ATA, DOW y Monumenten Bureau Aruba pa hunto realisa un proyecto cu lo ta un joya den e centro di Oranjestad cu nos tur por ta orguyoso di dje.