ORANJESTAD (AAN): Museo Arqueologico Nacional Aruba (MANA) ta anfitrion di dos exposicion temporario nobo cu ta impresionando bishitantenan.
Di dialuna pa diabierna entre 9’or di mainta pa 5’or di atardi, publico por bin admira e exposicion “Origen Caribense, den Pret y Fantasia”, ubica den e edificio “Fruteria” te dia 11 di juli y e exposicion “Old Cunucu Houses” te dia 4 di juli den “Hadrey di MANA”.
“E exposicion “Origen Caribense, den Pret y Fantasia”ta un tributo na 25 aña di participacion di carnavalista Rita Werleman den “Los Laga bai”, y na su participacion na festival di Calypso y Roadmarch como “Queen Hortense y su decibels”. A traha un documentario di desaroyo di Rita Werleman y su desaroyo como carnavalista y compositor/cantante. E trahenan y nan potret ta ilusta desaroyo di estilo carnavalesco durante añanan. Bin admira tur esaki y goza di musica di carnaval.
E exposicion ‘Old Cunucu Houses’ ta e resultado di un tayer artistico di 12 siman, cu a tuma luga den auditorio di MANA, unda hoben entre edad di 10 pa 18 aña a haya guia di artista Jo-ann Kock-Ridderstap.
Durante 3 luna e hobennan entusiasma a siña diferente aspecto di arte y tambe di nos cultura. No solamente nan a experimenta cu ‘sketching’, pinta cu verf acrilico y siña tecnica di pinta sombra, pero alavez nan a experiencia un recorido di monumento y a conoce historia di nos antepasadonan na MANA. Nan a haci un investigacion hunto cu nan mayor Oficina di Monumento tocante e cas di cunucu di nan escogencia. E exposicion aki a habri recien, dia 7 di juni, pa publico y a impacta esnan cu tabata tey e anochi ameno di apertura.
Publico por disfruta di e exposicion impresionante di pintura y investigacion di cas di cunucu den “Hadrey di MANA”. Museo Arqueologico Nacional Aruba ta ubica na Schelpstraat 42, den e compleho di cas historico di famia Ecury y edificionan moderno.
