Jonathan Trinidad di Universidad di Aruba:
ORANJESTAD (AAN): Jonathan Trinidad, Docente di Trabao Social na Universidad di Aruba a haci un recordatorio na comunidad di Aruba pa participa awenochi na e combersacion publico cu lo tin na Biblioteca Nacional riba e topico di pobresa.
El a splica cu e combersacion aki lo ta di 7 pm pa 9 pm y ta trata e tema di solucionnan innovativo pa e problema social di pobresa. Esaki ta den cuadro di e exposicion cu e studiantenan di Bachelor di Facultad di Trabao Social y Desaroyo a lansa algun siman atras, cu tin di haber cu cuadranan di problemanan social y nan solucion aki na Aruba.
E studiantenan a haci un enfoke riba e problemanan social y solucionnan pa Caribe y Latino America. Relaciona cu esaki, awenochi lo tin e dialogo publico cu diferente profesional cu lo uni cu e studiantenan y lo papia riba e tema aki, Trinidad a indica.
E proyecto aki ta mara na un materia cu ta ser duna na Universidad di Aruba cu ta trata problemanan social den Caribe y region como tambe Aruba. Den e materia aki e studiantenan a bay haci investigacion y analisa e raiz di e problemanan.
Nan a uza diferente teoria sociologico pa para tras di loke nan ta presenta como un expo y asina duna un peso mas fuerte na loke ta un problema, kico ta e raiz di dje y e posibel solucionnan.
E studiantenan a resalta diferente problema social y esun cu mas a bin dilanti ta e aspecto di pobresa mirando cu tin pobresa den diferente aspecto, Kier a trece esaki den forma di un dialogo publico pa asina bay trata e tema aki.
E tema a wordo carga door di diferente investigacion, pero pa por duna un aporte tin diferente persona for di e sector social cu lo ta presente pa profundisa riba e tema aki, Jonathan Trinidad a indica.
E evento aki ta gratis awenochi na Biblioteca Nacional.
