Partido MFK a marca historia y obtene un mayoria absoluto

Eleccion na Curaçao

• Pueblo a respalda Partido di Prome Ministro Gilmar ‘Pik’ Pisas
• Victoria aplastante cu 55% di e votonan 

WILLEMSTAD: E partido cu tabata na mando na Curaçao, esta Movementu Futuro Korsou (MFK) a obtene un victoria aplastante den eleccion di Diabierna na Curaçao, ganando 55% di e votonan.  Di e forma aki, esey a bira prome biaha den historia di Curaçao cu un solo partido ta obtene e mayoria absoluto den Parlamento, cu ta habri caminda pa e bay goberna su so.

   Urnanan electoral a cera 7:00 pm, y e cantidad di votador tabata como 69%, cu ta un tiki menos di e 74% cu a bay vota den eleccion anterior na 2021.

   Partido MFK a logra haya 41.638 voto, cu ta un mayoria y e lider Gilmar ‘Pik’ Pisas a splica cu el a keda hopi emociona y feliz cu e decision di pueblo.  El a splica cu nan lo bay sigui cumpli y engrandece Curaçao.  El a bisa cu e ta cla pa 4 aña mas, y ta contento cu pueblo a papia cla y raspa.

   Pueblo di Curaçao a expresa cu nan a sinti cu Partido MFK a traha duro, y a presenta varios logro.  Tambe nan ta notando con turismo ta creciendo aun mas grandi cu nunca.  Pesey a duna confianza den Pisas pa e sigui lucha pa e pais.

   A bira conoci tambe cu MFK a campaña hopi cerca e Hulandes Europeo bibando na Curaçao, y aparentemente nan a dune e sosten.  Aunke awor tin algun hende cu ta preocupa cu un solo partido ta bay goberna, y tin miedo di loke a socede den pasado, toch mayoria ta kere cu un solo partido lo bay trece un gobierno hopi stabil di 2025 pa 2029.

   E hecho cu na a logra e gran mayoria, ta mustra cu nan ta dominando e plataforma politico na Curaçao.  Nan a logra haya 41.638 voto, y e partido cu ta na di dos lugar a haya apenas 12.297 voto.  E victoria ta asina aplastante pa e partidonan chikito, cu Diasabra mes, e lider Gilbert Ricardo di Partido MK (Miho Korsou) cu apenas a haya 1.540 voto, a dicidi na entrega su retiro como lider.  El a bisa cu e ta bandona politica activo.

  Na final pues, MFK a haya 13 asiento, PNP a haya 4 asiento, MAN-PIN a haya 2 asiento, y PAR a haya 2 asiento.