Partido MEP y Forsa Femenino Grace a conmemora 25 aña di fayecimento di Grace Bareño

ORANJESTAD (AAN):  Dia 14 di juli, Forsa Femenino Grace hunto cu Partido MEP y famia Bareño y Heronimo, a recorda 25 aña di fayecimento di e dama politico Grace Heronimo Bareño.

             E ceremonia a tuma luga na Santana Protestant na Piedra Plat y a inicia cu ponemento di krans y a sigui cu bunita discursonan di Lider di MEP y tambe di señora Fabiola Maduro, Presidente di Forsa Femenino Grace.

            Presente na e ceremonia tawata Lider di MEP y Prome Minister di Aruba, Evelyn Wever-Croes, Parlamentario Darlaine Guedez-Erasmus, Parlamentario Setty Christiaans-Yarzagaray, Minister Endy Croes, miembronan di Forza Femenino Grace y famia- y amigonan.

            Grace Bareño a nace na Aruba dia 22 di maart 1945 y a fayece dia 14 di juli 1999. Na un edad hoben, Grace a tuma e decision pa drenta arena politico y tawata na e eleccion di Eilandsraad 1975 cu Grace Bareño, como e prome dama cu a yega di aparece riba lista di nos partido, den su prome salida a obtene 455 voto, cual ta un cantidad considerabel e tempo ey. Te cu e eleccion di 1989 Grace fielmente a aparece riba lista di MEP.

            Grace tawata tambe e prome dama na Aruba cu a asumi e encargo di diputado di Teritorio Insular di Aruba. Durante di su trayectorio como gobernante, Grace a dedica gran parti di su trabao den e area social y a percura specialmente pa esnan cu limitacion den comunidad ya cu den pasado como profesional su persona semper a traha incansablemente pa e grupo special aki, e.o. na Bibito Pin School na Piedra Plat.

            Como politico active, Grace a lucha schouder cu schouder cu nos Libertador Betico Croes y tawata danki tambe na su perserverancia y contribucion valioso, awe Aruba ta un pais liber den Reino Hulandes.

            “Mi ta gradici Presidente di Forsa Femenino Grace, señora Fabiola Maduro pa e bunita trabou cu nan ta haci y pa su bunita palabranan durante su discurso. Grace Bareño a laga un legado bunita y fuerte atras cu pa generacionnan nos dilanti. E ta wordo recorda como un dama fuerte den politica y como un ser femenino cu a traha incansablemente pa un meta comun di nos partido y comunidad en general. E lealtad incondicional di señora Grace Bareño na su partido MEP y su stimacion pa Aruba lo keda semper graba den nos memoria. Cu Grace sigui sosega den brasa di nos Señor”, Lider di MEP a expresa.