Participacion yen entusiasmo na Aruba den World Cleanup Day 2021

ORANJESTAD (AAN): Aruba tabata un di e 180 paisnan cu a participa den World Cleanup Day riba Diasabra, cu mas di 60 voluntario dirigi pa Bucuti & Tara Beach Resort den cooperacion cu Fundacion Parke Nacional Aruba (FPNA).

   Tanto FPNA y Bucuti & Tara Beach Resort a invita gruponan educacional local, incluyendo International School of Aruba, Universidad di Aruba, Fofoti Tours, e grupo di Interact, y huesped y staf di Bucuti & Tara pa participa den e esfuerzo pa haci e area rond di Arashi completamente limpi.

   World Cleanup Day a wordo organiza cu un meta cu ta cruza frontera y ta un desafio di diferencianan religioso y cultural.  E ta un di e movimentonan civico mas grandi, cu a uni paisnan rond mundo cu e mision pa facilita un planeta mas limpi.  Aña pasa mes, e Dia Mundial di Limpieza aki a trece hunto mas di 11 miyon hende, apesar di e dificultadnan di Covid-19.

   Simplemente bisa, World Cleanup Day ta probecha di e poder y e entusiasmo di hendenan rond mundo cu ta desea un bida sostenible pa futuro generacion y ta uni na esaki.  E movimento di e aña aki ta enfoca riba un area critico pa Aruba, esta oceano.  Cu e 70% di oxigeno mundial produci door di oceano, ta devastador cu 8 miyon di ton di plastico ta sigui contamina lama cada aña.  E tema di 2021 ta pa concientiza y traha pa stop e fluho di sushi den lama.  E limpieza di sushedad y residuonan mal maneha for di beach y cayanan di Aruba lo bay tin un impacto positivo riba flora y fauna submarino, y henter mundo mes.

   E muchanan di EcoKids di International School of Aruba a laga sa: “Nos ta eco warriors hoben!  Nos mision ta pa yuda oceano y nos isla bunita di Aruba.  Nos kier proteha y yuda mundo pa futuro generacion.  Danki Bucuti & Tara Beach Resort pa inspira y sostene nos.”

   For di Universidad di Aruba, e Rector Dr. Viola Heutger y algun studiante di exterior a uni tambe na esaki.

   Fofoti Tours a suministra transporte pa e lugar di limpieza, y a splica cu nan tambe ta sostene un balanza saludable entre turismo y proteha medio ambiente.

   Dos turista cu cada aña ta hospeda e di tercer siman di cada luna na e Resort, esta Michael Wildemand y Annette MacMullin procedente di Teuksbury (Massachusetts), sa participa den e clean-up mensual di Eagl beach.  E biaha aki nan a uni y conoce e grupo robusto di hendenan local cu stima nan isla durante e World Cleanup Day.  Y e evento tabata un gran exito.