ORANJESTAD (AAN): E aña aki e famoso Soul Beach Music Festival (SBMF) ta bay tuma lugar di 24 pa 29 di Mei.
Esaki ta bay ta e di 21 SBMF y durante un conferencia di prensa Diaranson, Mark Adkins, CEO di Soul Beach Festival Productions a papia di e exito di e festival durante dos decada y a anuncia kende ta e artistanan cu lo presenta na Aruba.
E aña aki ta bay tin presentacion di e famoso banda The Roots, cu pa mas di dos decada ta hunto y ta produci cancionnan grandi.
The Roots ta e banda tambe di e talk show di Jimmy Fallon.
Banda di The Roots cu ta presenta Diasabra, Lucky Daye tambe ta bay ta riba stage, pero Diadomingo.
E ta un artista hopi prometedor cu ya caba ta hayando respet grandi for di artistanan renombra na Merca, segun Adkins.
Anthony Hamilton ta bay duna un presentacion tambe, mientras cu e atraccion principal ta bay ta Jill Scott, kende lo presenta Diadomingo.
Jill Scott tin un cantidad grandi di hit y ta hopi stima na Merca y rond mundo.
Riba Comedy Night, cu ta Diabierna anochi, Deon Cole y Tiffany Haddish ta bay deleita publico.
Haddish ta un actriz tambe kende a actua den diferente pelicula mas tanto di comedy, banda di streanan grandi manera Kevin Hart.
Chase Anthony ta bay ta e anfitrion riba stage pa e Comedy Night, mientras cu actor/comediante Chris Spencer lo ta anfitrion pa e dos anochinan di concierto.
Adkins durante e conferencia di prensa a papia riba e exito cu e festival tin, specialmente pa loke ta e meta di trece mas turista Mericano di color pa Aruba.
El a splica cu desde cu e SBMF a cuminza den su prome añanan, poco poco mas turista di color a cuminza yega Aruba.
Pa loke ta e festival mes varios turista Mericano ta keda cerca di un siman of mas na Aruba, mientras cu door cu nan a gusta nan a keda bishita nos isla, treciendo mas amigo y famia tambe.
Adkins a splica cu tur aña bo por wak riba social media e gruponan di persona cu ta comenta riba Soul Beach y ta stimula otro pa nan tambe bay presencia e festival.
Adkins a menciona tambe ehempel di artistanan cu a bin presenta na Aruba pa e SBMF, kendenan awor a bira mas grandi y famoso.
{gallery}Soul Beach Music Festival ta inclui The Roots, Jill Scott y Tiffany Haddish{/gallery}
