Minister Geoffrey Wever
ORANJESTAD (AAN): Manera cu DIARIO a trece dilanti, siman pasa Minister di Finansa, Asunto Economico y Sector Primario di Aruba, Sr. Geoffrey Wever, a representa Aruba na reunion di Conseho di Ministro di Caribbean Financial Action Taskforce (CFATF) cu ta tuma luga na Ciudad di Panama. CFATF ta un organo regional di Financial Action Taskforce y ta conta 25 miembro, cu ta coordina e esfuersonan di paisnan di Caribe pa fortalece nan sistema contra labamento di placa, financiamento di terrorismo y financiamento di proliferacion di armanan di destruccion masivo.
Como miembro di e Conseho di Ministro di CFATF, Aruba a uni cu otro representante na nivel ministerial pa aproba e direccion strategico y maneho di CFATF pa e periodo 2025–2028, incluyendo e plannan subsidiario den varios area operacional. E reunion aki a sirbi tambe como un plataforma pa gobernantenan reafirma nan compromiso politico cu CFATF su mandato y pa garantisa cu nos region ta bon prepara pa duna respuesta na e reto global den lucha contra crimen financiero.
Na aña 2021 Aruba a pasa e evaluacion mutuo di CFATF den un forma formidabel y e siguiente evaluacion lo tuma lugar na luna di maart di aña 2030. Aruba pa medio di varios instancia local, manera Banco Central, Ministerio Publico y Unidad di Intelligencia Financiero di Aruba FIU-Aruba) ta participa activamente na e actividadnan y reunionnan plenaria di CFATF.
Durante e prome dia di e ‘Council of Ministers Meeting’ di Caribbean Financial Action Taskforce (CFATF), Minister di Finansa, Asunto Economico y Sector Primario, Sr. Geoffrey Wever a encabesa e delegacion di Aruba y a topa cu varios colega minister di nos region. Den e cuadro aki Minister Wever a hiba un conversacion cu Premier di Cayman Islands, cu ta alavez Minister di Finansa di e pais menciona, Sr. Andre Ebanks. Minister Wever a intercambia ideanan y tambe a mustra interes pa e strategia di Cayman Islands pa engrandese nan sector financiero.
Durante e di dos dia di e CFATF Council of Ministers meeting, presidente actual di Financial Action Taskforce (FATF) , Elisa de Anda Madrazo, tabata presente pa hiba un discurso na tur e Minister y Procurador Generalnan cu ta encabesa e delegacion di nan respectivo pais. Presidente di FATF durante di su discurso a acentua e compromiso di nos region pa cumpli cu e standardnan internacional den prevencion y combatimento di labamento di placa, financiamento di terrorismo y di proliferacion di armanan di destruccion masivo. Presidente De Anda Madrazo a indica cu FATF ta consciente di e hecho cu por ta dificil pa paisnan chikito, manera esnan Caribense, cu tin recursonan limita pa cumpli cu standardnan internacional. Sinembargo, FATF ta compromete su mes pa keda duna apoyo unda mester pa nos por salvaguardia e integridad di e sistema financiero global. Minister Wever a logra intercambia di pensamento cu Presidente di FATF y a accentua tambe e compromiso di Aruba riba e tereno aki.
Durante di e dos dia di reunionnan, paisnan Caribense a haya informacion di e proceduranan di e di cinco ronde di evaluacion mutuo. Den e cuadro aki Aruba lo worde bishita pa e team di assesornan den luna di maart na aña 2030. Minister Wever a afirma tambe cu Aruba lo ta bon prepara pa pasa e ronde di evaluacion aki tambe na manera exitoso.
Minister Wever a felicita e presidente di CFATF, Señora Fayval Williams cu ta minister di Finanzas di Jamaica, pa e manera cu el a logra e metanan di CFATF durante e aña cu a transcuri. Alavez a felcita Procurador General di Barbados sr. Dale Marshall cu ta e Presidente entrante di CFATF entrante 1 di december di e aña aki. Sr. Marshall a presenta su plan strategico pa e aña 2025 – 2026 y cual a keda aproba unanimamente. Pa e presidencia 2026-2027, Aruba a sostene e candidato di Turks & Caicos Islands cu ta Procurador General Rhondalee Braithwaite-Knowles, un dama cu tin admiracion pa e manera cu Aruba a completa su di cuater ronde di evaluacion mutuo na aña 2021.
Mescos cu e Conseho di Ministro di Gobierno di Aruba, topiconan cu ta worde discuti den esun di CFATF tambe ta confidencial. Sinembargo, ministernan por a sera conoci cu otro, siña di experiencia di otro y compromete nan mes pa duna otro sosten y apoyo durante di e proceso di evaluacionnan mutuo. Minister Wever a indica cu tabata un honor pa wak cu Aruba tin un stoel y un voz na mesa di CFATF, atravez di e participacion activo di nos ambtenaarnan den reunionnan mensual di CFATF cu ta worde organiza na manera virtual.
