Gregorio Wolff den su analisis ta conclui:
*Aruba a conoce varios ola di imigracion
ORANJESTAD (AAN): Aruba tambe a conoce e problema di emigracion y awe esun di imigracion.
E problema aki, semper a existi durante historia di humanidad. Ora tin situacionnan dificil pa pueblo por sobrevivi, e ser humano pa su sobrevivencia ta wak den emigracion como e solucion pe y su famia. Hopi biaha e ser humano ta emigra pa un periodo, gana placa, manda placa pa famia y si por ta bolbe bek.
Awe e imigrante ta pasando den duro si nos wak kico ta pasando na Merca, na Europa y na hopi paisnan. Na Merca presidente Trump a presenta su medidanan pisa contra e imigrante, Europa cu critica arriba Trump toch nan ta sigui e mesun ehempelnan di Trump.
Aruba a pasa den e periodo dificil aki den e añanan dificil di 1910 pa 1925. Apesar di ta un colonia Hulandes, nos no a ricibi e ayudo necesario di Hulanda, hasta dokternan tabata bini di Merca.
Segun informacionnan di e temponan ey, hopi hende, specialmente muchanan tabata muri di hamber. Esaki a causa cu hopi hombernan a bay traha na CUBA, Colombia, Venezuela y mas pais. Tin casonan cu e famianan completo a emigra. Hopi a bolbe bek, otronan a keda traha y biba na e pais cu nan a emigra. Pues e imigrante ta un trahador, kende ta Sali for di un situacion insigur na su pais pa bay traha y biba den un otro pais cu e speransa cu su situacion social/economico/financiero lo mehora.
Aruba a conoce varios ola di imigracion
Despues cu refinaderia Lago a habri su portanan na 1928, nos a conoce varios olanan di imigracion den e añanan 30-40-50, specialmente di e paisnan di Habla ingles den Caribe, tambe di Colombia y Venezuela, Corsow, Bonaire y Surnam. Mayoria tabata pa traha den e refinaderia Lago. Despues den e añanan 1988 pa 2005, nos a conoce e imigracion di hendenan, specialmente di Colombia, Venezuela, Peru, Filipinas pa traha den e hotelnan construi cu garantia di Gobierno. E Ola di imigrantenan aki, cu den lineanan grandi a cumpli cu un plan o sistema cu gobierno a stipula. Maske aki y aya tabatin fayonan, pero den lineanan grandi no tabatin problemanan grandi.
Como 10 pa 15 aña pasa a inicia otro ola di imigracion, di paisnan di Latino America, specialmente di Venezuela pa traha den construccion. E Venezolanonan den mayoria di caso tabata drenta via lama cu boto/lancha. E ola di imigracion aki ta conoci tambe como e ola di trahadornan sin papel di residencia na Aruba, esta loke nos ta yama ilegal.
Awe Aruba parce tin e record mundial pa loke ta e porcentahe di trahadornan imigrante cu ta ilegal den comparacion cu e trahadornan local y tambe pa loke ta e porcentahe di poblacion ilegal den comparacion cu e población inscribi legalmente.
Den un otro articulo por sigui lesa e di dos parti di e articulo aki.
