Participacion exitoso di Aruba Bank na Seminario “Mi Poder Financiero”

ORANJESTAD (AAN): Aruba Bank ta contento di a participa den e seminario “Mi Poder Financiero” organiza pa Fundacion Plan di Bida Aruba, cu a tuma lugar na Renaissance Convention Center.

   E evento a trece nos comunidad hunto pa siña tocante e aspecto nan esencial di un bon maneho financiero.

  Fundacion Plan di Bida Aruba, a organiza e seminario aki pa promove un bon maneho financiero y duna solucion nan practico pa maneho di finanzas. Nan programa ta inclui plan di presupuesto, di debe y arreglonan di pago pa duna sosten na e comunidad.

   E seminario a conta cu participacion di diferente experto local, notario, realtor y profesionalnan legal. Aruba Bank a duna un presentacion tocante e paso nan pa yega na bo propio cas.

   Participantenan tabatin oportunidad pa bishita e “booth” di Aruba Bank pa informacion y conseho financiero personalisa tocante hipoteca.

   Aruba Bank ta orguyoso di a participa den un evento cu ta promove bienestar financiero den nos comunidad. Pa esnan cu no a logra asisti e seminario of cu tin mas pregunta tocante di hipoteca, por bishita e website di arubabank.com pa haya sa mas.