Participacion di cada ciudadano den expansion di economia ta condicion fundamental pa garantiza economia sostenibel y inclusivo

ORANJESTAD (AAN): Gobernador Alfonso Boekhoudt durante su discurso den Parlamento Diamars riba apertura di Aña Parlamentario Nobo

a papia di e continuacion di crecemento di economia riba nos isla y el a bisa cu e continuacion di crecemento economico ta demostra cu como isla chikito nos ta dispone di e capacidad pa hunto supera retonan cu presenta den nos desaroyo economico y nos bida diario.

“Expansion di actividadnan economico ta un meta riba su mes, pero tambe un instrumento esencial pa desaroyo y bienestar di nos pais y di tur su ciudadanonan”.

Sinembargo ainda tin hopi di nos cu no tin un vivienda pagabel pa construi nan hogar y ta mira nan poder di compra bay atras structuralmente.

No solamente participacion di cada ciudadano den expansion di nos economia ta un condicion fundamental pa garantisa un economia sostenibel y inclusivo, pero tambe ta aumenta nan oportunidadnan pa logra nan meta y nan formanan di subsistencia.

Stimula mas sector economico na un manera sostenibel y inclusivo ta tuma su tempo y inversion. Lo sigui mehora e clima empresarial y clima di inversion door di keda promove pa tur comerciante tin condicionnan y oportunidadnan igual pa haci nan negoshi. P’esey lo continua cu e plan di accion pa combati economia informal y asina stimula competencia husto cu lo trece beneficio tambe pa e consumidor, segun Gobernador.

El  sigui bisa:

“Na mesun momento ta buscando opcionnan pa por baloriza nos recursonan, cu por resulta den un modelo economico nobo unda e medio ambiente ta haya su balor a base di menos uso di combustible convencional.

Como economia chikito, cooperacion economico cu paisnan den region ta beneficioso pa comercio y consumidor. Lo intensiva cooperacion cu nos hermana islanan riba diferente tereno economico.

Cu e meta pa trece actividad economico bek den centro di Oranjestad y San Nicolas, lo sigui implementa entre otro e Plan di Revitalizacion di Oranjestad cu mas iluminacion, parkeo y areanan pa entretenimento y recreacion pa local y turista. Gobierno su meta ta pa duna e estimulo necesario pa sector priva haya confianza pa e sector aki tambe inverti na su turno den centro di ciudadnan. Pronto lo sigui encamina e trayecto di revitalizacion di San Nicolas impulsando desaroyo nobo, pa asina rebiba loke ta existente.

Ta importante pa subraya, cu desaroyo solamente por wordo realmente yama desaroyo, si esaki ta uno inclusivo den cual ningun hende ta keda atras. Inclusion social, economico y politico di un y tur mester wordo promovi. Gobierno ta trahando riba un campaña di concientizacion pa promove igualdad y un foro nacional lo tuma lugar unda gruponan di interes ta invita pa bini hunto y dialoga encuanto diferente tema cu ta biba den nos comunidad, entre otro: pronostico demografico, pensioen y calidad di cuido, como tambe e desafionan cu nos adultonan mayor ta enfrenta.

Gobernador a indica tambe cu enseñanza di calidad ta algo sumamente importante pa nos comunidad.

“E resultadonan di e investigacion den enseñanza na Aruba a wordo alinea pa yega na e metanan cu ta calidad basico di enseñanza, enseñanza pa un y tur, y competencianan apto pa e mundo actual y di futuro”. Calidad basico di enseñanza ta encera cu tur alumno tin derecho pa participa na un enseñanza di calidad cu ta ofrece oportunidad pa sigui crece, segun Gobernador.