Cifranan oficial di Aruba a confirma tur informacion di DIARIO --- *Cuanto adulto na Aruba tin salario riba minimo pa existencia? --- *Batata cayente politiconan den Reino no por afecta futuro Aruba
ORANJESTAD(AAN)- Entrante awe Miembronan di Parlamentonan den Reino lo reuni cu otro na St. Maarten.
E reunion aki tabata motibo cu a pidi e Secretario Hulandes di Relacionnan den Reino, Alexandra van Huffelen, pa duna e paisnan Caribense den Reino Hulandes mas espacio pa atende cu e reformanan cu mester bini pa soluciona e situacion financiero serio di e paisnan.
E plan pa reforma presenta dor di Reino Hulandes, COHO, ta un batata politico cayente y por mira cu ya e paisnan Sint Maarten y Curacao a trece dilanti cu nan no ta bay di acuerdo cu e exigencianan actual y cu nan kier un renegociacion nobo.
Informantenan clave di DIARIO, cu a yuda informa e Pueblo den e temponan sumamente dificil cu Aruba conoce for colapso na 2018 ora Aruba mester a tuma medida pa no bati bancarota, a mustra cu no tin tempo mas den e situacion mundial pa genashi politico.
Durante eleccion 2021, Aruba contrario cu tabata e caso na por ehempel Curacao, a duna su aprobacion na Prome Ministro Evelyn Wever-Croes pa continua cu un maneho realistico pa Aruba.
E situacion financiero actual di Aruba y tur otro pais den Reino, incluso Hulanda, ta wordo seriamente amenasa pa e situacion na Ukraine cu ta sigui di e preocupacion serio.
Den e situacion aki, cifranan oficial a wordo presenta y dor di expertonan di Gobierno cu a indica cu na e momentonan aki pa un persona no cay den e grupo di “pobresa”, e mester tin un entrada di 2.372 Florin pa persona.
Informantenan ta indica cu esaki ta nifica cu un gran parti di Aruba ta den problema financiero, cu no ta bisto debi na e forma cu famianan ta biba cu otro y tambe e cantidad di hende cu ta gana algo extra pa asina por hiba un bida decente.
E situacion actual ta sumamente dificil y no tin tempo pa politica wordo hunga den seno di Reino y bienestar di Aruba wordo pone na wega.
“Ta for di 2020 a negocia cu Reino den pandemia, sin tene na consideracion cu guera internacional, cu actualmente ta wordo yama mundial, y awor mester yega na clausura di negociacion y yega na palabracion. Si no COHO, kico lo tin?” informantenan ta trece dilanti.
Cifranan cu a mira luz e siman aki ta papia di e forma cu prijsnan a subi na Aruba, cu a conoce un inflacion den un situacion dificil.
Den un aña e gastonan di un persona a subi cu 5.1 porciento den un situacion mundial cu ta sigui causa prijs sigui subi.
Por spera mas aumento importante pa no papia mes di un situacion mundial peligroso, cu lo exigi Aruba y henter Reino, reforma y sigui reforma mientras ta adapta na e realidad mundial.
E tono politico cu por a nota ayera den circulonan di Miembronan di Parlamento den Reino ta duna un indicacion cu logro politico, haya voto, por ta mas importante cu pasonan dirigi na interes di e paisnan.
“Mundo ta basha abou. No tin tempo pa hunga politica mas. Aruba a bay di acuerdo pa permiti Reino yuda Aruba reforma, manera resultado di eleccion a demostra. No tin tempo pa papia mas,” informantenan a mustra.
Na Aruba tin hopi preocupacion pa e tono cu cual otro islanan a bay sinta na mesa di e Reunion di Miembronan di Parlamento creando impresion cu por bari e reforma for di mesa y por bay busca prestamo otro caminda.
DIARIO ta sigui tur desaroyo y lo informa Aruba na forma debido di loke ta pasa na e reunion, cu lo wordo sigui pa un bishita di urgencia di e Secretario di Estado na e paisnan Hulandes den Reino.
Tin puntonan cu mester discuti ainda cu Reino, manera e recorte di salario y loke por evita di esaki. Sinembargo, e tono di otro islanan no por hinca Aruba den problema, a bini dilanti di parti di informantenan.
