Analisis di un situacion mundial sumamente preocupante
ORANJESTAD(AAN)- Ta cu preocupacion sumamente grandi nos a sigui tuma nota ayera di desaroyonan mundial na un mundo caminda diferente interes ta topa otro.
Por papia di e situacion mas alarmante riba tereno mundial cu nos a conoce for di momento cu DIARIO a mira luz sigur si tene na bista cu ta interesnan cu semper a habri caminda pa conflictonan internacional di seriedad ta na wega.
Na tur forma DIARIO a trata di informa Aruba cu e mundo di ayera, a cera na momento cu Rusia a invadi Ukraine y a basha e sistema mundial abou na momento di cambionan mundial grandi.
Kico ta asuntonan cu mester wordo atende dor di mundo awor?
Na prome lugar e asunto di clima, cu ta un peliger grandi pa hende directamente dor di cambionan cu hende mes a introduci den su medio ambiente.
Situacionnan di tempo cu ta presenta rond mundo, ta papia un palabra cla di e peliger di un naturalesa cu conoce cambio.
Cambio di clima ta mishi cu interesnan financiero sigur den mundo di petroleo, manera for di inicio nos a informa.
Mundo a yega na acuerdo pa atende cu cambio di clima pero esaki lo afecta negoshi di petroleo, cu awe den e guera di Ukraine ta un elemento importante.
Den e guera di Ukraine tin elemento serio na momento cu un version nobo di Omicron ta haci hende comprende cu ainda e peliger no a pasa.
Kico Covid-19 ta haci ainda cu mundo por nota na China cu tin 500 barco cu carga pega loke ta nifica cu articulonan na benta pa Aruba tambe, ta na wega.
Den e situacion aki, Rusia mes ta uno di e paisnan cu lo conoce eleccion na 2022. Eleccionnan na manera cu Putin ta permiti, pero eleccion.
Dilanti porta di Aruba, Colombia ta prepara pa un eleccion cu ta dicidi si socialismo ta haci cu entrada den gobernacion na Colombia.
Na Merca lo tin eleccionnan pa Cas di Representantenan, miembronan di Congreso entre otro.
Asina por sigui mientras instabilidad ta sigui aumenta.
Na e momentonan aki, cada ciudadano tin un responsabilidad na Aruba y henter mundo.
Hunto mester enfrenta un caida den nivel material cu nos a conoce cu hasta prijs di pan den aumento.
Awe mas cu nunca perioodismo tin un tarea, cu ta di prepara comunidad pa berdad y realidad mundial.
Den e cuadro aki e interes di e pais lo mester keda dilanti pa por pasa den turbulencianan pisa cu ainda mundo por conoce y cu por afecta Aruba, cu den pasado a conoce situacionnan sumamente dificil pero cu patriotismo y fe a sigui cana dilanti!
