Edgard Vrolijk, Presidente
ORANJESTAD (AAN): Aña Parlamentario nobo a habri y cu esaki ta bin trahando riba diferente asunto. Presidente di Parlamento, Edgard Vrolijk a duna di conoce den entrevista cu DIARIO cu un di e enfokenan cu tin ta esun relaciona di e independisacion di Parlamento. El a indica cu dialuna mainta mes tabata tin un reunion unda a yega na otro. Aworaki e cambio mester bay Directie Wetgeving en Juridische Zaken y un bes cu e bin di DWJZ e cambionan constitucional tin cu bay Hulanda pa haya aprobacion y despues e por bay Raad van Advies.
Tambe dialuna mainta a keda cla cu tur e cambionan pa loke ta 'reglement van orde'. E Comision ta bay haya un par di siman pa pasa door di dje y pa despues bay DWJZ. Asina pa prome cu fin di aña ta spera cu tur cos ta canando su caminda, bay Raad van Advies locual ta bay falta solamente pa trat'e, Edgard Vrolijk a señala. E ta gradici tur e coleganan cu ta parti di e comision aki y cu por a logra yega asina leu. Presidente di Parlamento a laga sa cu ta bay manda Departamento di Recursonan Humano un carta pa recorda nan cu mester duna un 'assessment' pa locual ta e trahadornan den parlamento y pa wak e plan con ta bay independisa e trahadornan.
DRH a priminti esaki ta e 3er cuartal y ya esaki a pasa. Naturalmente mester recorda DRH esaki ya cu parce cu Parlamento ta e ultimo cu DRH ta corda riba dje siendo cu Parlamento ta constitucionalmente mas halto cu Gobierno, a remarca. Pesey ta manda un carta pa DRH pa recorda nan y puntra con a para cu esaki.
El a agrega cu banda di e renobacion di e edificio, di e independisacion, tambe tin Bureau Rampenbestrijding trahando riba un plan di seguridad pa loke ta e parti di evacuacion cu ta haci falta. Ora cu keda cla cu esaki por bisa cu Parlamento por bay den un era nobo di independisacion, cu tur regla na ordo. "Kiermen un Parlamento cu entrante 2025 mester funciona na un otro manera", a expresa.
Parlamento ta bay conoce hopi cambio no solamente den infrastructura, pero tambe den e manera di traha internamente, cu richtlijnen duidelijk. Tin un plan di evacuacion cu no tabatin, a subraya. "Ora bo tin un lugar asina akinan cu ta bisa cu ta e organo di mas halto, e mester por funciona como tal tambe", a agrega. Den sala di Parlamento tambe lo conoce cambionan unda entre otro lo bin interupcionnan cu ta conoci na Hulanda y ta exigi hopi di un presidente di parlamento pa ta activo riba dje. E ta trece un dimension nobo y ta espera cu e por duna mihor contenido tambe na Parlamento, Edgard Vrolijk a declara. Pa cambio semper ta haya critica, pero e ta na bienestar di pueblo, a enfatisa.
