A duna inicio na e siman di test di oido
ORANJESTAD (AAN): Dialuna Quota Club Aruba a duna inicio na Siman di Conscientisacion di Cuido di Oido. Esaki a tuma lugar na FEPOH. Stella Monsanto, Service Director di Quota International of Aruba pa aña 2023-2024 a duna di conoce cu luna di September ta e luna cu Quota ta dedica na e conscientisacion di cuido di oido.
El a indica cu na cuminsamento di September tabata tin un rueda di prensa pa asina invita pueblo pa haci un cita den cualkier di e cuater localidad disponibel pa haci test di oido gratis.
Dialuna, oficialmente a inicia cu e testnan di oido te cu dia 22 di September pa esnan cu a haci nan cita.
Monsanto a laga sa cu FEPOH a yena den dos dia. Aruba Hearing Institute tambe a yena. SVb San Nicolas parce tabata tin algun lugar mas habri. Semper e cuponan ta yena hopi lihe, a remarca.
Quota ta haciendo esaki ya caba pa 32 aña caba y nan ta hacie pa conscientisa e pueblo pero esey no kiermen cu tin cu warda te ora Quota anuncia e siman aki pa bay haci test di oido, a bisa.
Tuma bo tempo pa bay haci test di oido pa asina haya sa si bo oido ta bon of mester di un 'hulpmiddel' pasobra bo tin un perdida. "Pero mas bo warda, mas bo oido ta bay atras y e ora mas pio e ta bira".
Ta hopi importante pa tur hende ta consciente di nan oido. Quota su mensahe semper ta cu si e ta demasiado duro, demasiado cerca y demasiado largo, e ta dañino pa bo oido, Stella Monsanto a declara.
El a agrega cu tur aña Quota ta haci un evaluacion y nan ta wak cu de bes en cuando tin e balansa caminda tin menos of tin mas. E ta varia. Pero Quota ta keda cu e campaña pasobra ta hopi necesario pa e conscientisacion no solamente pa e temporada di carnaval. Companianan tambe mester ta consciente di cuida nan trahadornan, a agrega.
