ORANJESTAD (AAN): Diasabra 2 october 2021 pa 7’or di mainta tin Santa Misa na Kapel di Alto Vista, y mesun momento den Kapel di Cas Curason di Maria na San Nicolas. (Blue Army Center)
Prome cu Santo Eucarestia ta resa Santo Rosario pa 6.15 “Misterio Gososo”, despues ta sigui cu Salve Regina. Ta invita henter e pueblo, deboto y fielnan pa asisti na e Santa Rosario prome cu misa.
Luna di october ta luna di Mama Maria, E ta intersede pa nos na nos Tata Celestial. Tur fielnan di Mama Maria ta bin resa e Santo Rosario pa bienestar di henter comunidad di Aruba.
Tur dia nos Papa Francisco ta haci un suplica na mundo henter pa resa e Santo Rosario, nos ta den un tempo di crisis grandi, hopi no ta weita cu nos ta den un pandemia cu nos no ta mira e fin. Aki na Aruba ya nos ta sinti e Cambio di Clima.. E caliente di e solo ta afecta nos tur dia. Ta hopi mas calor y e caliente ta kima nos cuero. Aki na Aruba tin hopi hende cu miedo, como bo no sa ken no a vacuna. Na Aruba tin 4 klas e siman aki cu mester a bay cas como cu no tin school pa via un mucha tin e Covid-19. E mucha inocente a pega otronan.
Den e tempo aki cu malesanan ta invadi Humanidad. Laga cu nos ta mas conciente cu nos mester di oracion.
Tur cu ta traha den servicio di casnan di hende grandi, resa pa nan, nan ta traha den riesgo den hogarnan y den casnan di Sosiego, esnan cu no ta vacuna ta un riesgo pa otronan cu nan ta biba cu nan, no ta hende grandi so, pero pa muchanan inocente. Esnan cu ta traha den hospital, tur nurse y dokternan ta haci nan empeña pa salba bida di pacientnan.
Nan ta mira e ansha y sufrimento y tristesa di e muribundo. Pa tur cu no a bay tuma e vacuna, pa nan realisa cu ta pa nan mes bon, pa cu nan famia. Ban haci un curashi diasabra mainta trempan pa ofrece nos ora y asisti na Santa Eucaristia y resa pa tur esnan cu ta leu di iglesia. Laga nos ta resa pa necesidad di Iglesia Universal, pa Papa Francisco, Obispo Luis Secco, tur sacerdote, Diacono y laiconan cu ta hiba e bon noticia pa e pueblo di Dios.
Pa nos Gobernantenan y tur cu ta carga responsabilidad pa nos pais Aruba. Pa enfermonan den exterior cu a bay busca nan salud. Pronto lo ta na Aruba y gosa di un bon salud.
