ORANJESTAD (AAN) — Kico ta “cuero di cara”? Esaki ta loke nos a bay analisa despues cu Mike Eman a aparece atrobe riba pantaya pa bay entrega un lista di candidato cu ta papia di berguensa di un Pueblo.
“Kico ta cuero di cara?” Kico nos mester bisa generacionnan hoben cu e palabra “cuero di cara” ta nifica pa e Arubiano, cu a lucha y a bringa pa duna contenido na e balor di “cuero di cara”.
Pa comprende kico ta “cuero di cara” mester bolbe den Ridderzaal na Hulanda na 1983, ora Hulanda a trata atrobe di tene Aruba den e constelacion Antiano, cu a demostra di tabata un lucha legitimo.
Sin Status Aparte, Aruba no por a recupera di ningun crisis cu historia a presenta te awe na Aruba. Ta pasobra Aruba tabata tin su Status Aparte, su propio Banco Central, su propio Florin manera Betico Croes a exigi na nomber di Aruba, Aruba por traha riba su propio destino y no keda rehen di ningun lazo, hende of otro influencia.
“Cuero di cara” a resalta ora Reino Hulandes a kere cu historia di 12-8 por a ripiti y Betico Croes a bisa cu e ta acepta independencia, cu despues negociacion di Prome Ministro Nelson Oduber a elimina.
“Cuero di cara” a resalta ora na 2020 Raymond Knops kier a pusha Aruba lomba contra muraya, pero Evelyn Wever-Croes a bini cu un prestamo pa asina negociacion respetuoso di ambos lado por a sigui cu Hulanda.
Reino mester a respeta Evelyn Wever-Croes, cu Reino mes ta bisa cu a haci un bon trabou, mientras cu Raymond Knops a bisa cu tur razon cu Aruba tabata bancarota ora Hulanda a introduci supervision a base di Gobierno Mike Eman.
Na 2017 Mike Eman a bati retirada y a nenga di drenta Parlamento. Awor e ta bolbe pa encarbesa su lista di candidato, riba cual personanan cu yuda destrui Aruba den su gabinete, ta ocupa e miho luganan.
“Kico ta cuero di cara Mike Eman?” cu Arubianonan mester puntra ora Mike Eman ta pretende cu mester duna su persona oportunidad pa sigui destrui Aruba y haci Aruba rehen atrobe di un of otro pais?
Cu berguensa Mike Eman a cubri Aruba, aunke naturalmente cada hende tin su propio midi pa loke ta “berguensa” y “cuero di cara”.
Rapportnan oficial entre cual di e Comision di Supervision di Reino, ta papia di e forma cu Mike Eman a kita pan for di boca di e Arubiano.
Cifranan ta mustra kico Mike Eman a haci cu placa di un Pueblo cu pa generacionnan cu ta bini mester paga pa loke no tabata necesario. Pio ainda. Mike y su grupo elitario di hende cu ta considera su mes sabi, ni sikiera a preocupa pa administra e placa cu nan tabata abusa manera mester ta.
E loke mester a bira pan pa e Arubiano cu mester di asistencia social y no por percura pa su mes, a bira placa cu Mike a spart pa despues e bay sconde tras di lomba di Nicolas Maduro y trece Citgo.
Esaki ta loke Mike Eman a haci cu Aruba cu a keda rehen di Nicolas Maduro te na e momento cu Prome Ministro Evelyn Wever-Croes a bay kita e yabi for di Citgo.
E rapport di Refineria di Aruba ta splica awe kico a pasa cu e piscina di placa di Refineria di Aruba.
Awe Mike Eman kier poder atrobe.
“Kico ta cuero di cara” nos ta trata di analisa. Ora nos mira Mike Eman cu a trapa riba reglanan importante di Aruba y a destrui Aruba sigui practica mentira, nos ta keda sin contesta pa “cuero di cara” cu aparentemente a zink den awa ora Mike Eman a bay sconde despues di a destrui Aruba!
